Breaking News
कालिका नगरपालिकाले ११ करोड बढी लगानी गरेको प्रशासकीय भवन निर्माण अन्तिम चरणमा
निरुता बि.क
चितवन, कात्तिक १५
भाडाको घरमा बस्दै आएको चितवनको कालिका नगरपालिका आफ्नै प्रशासकीय भवनमा सर्दै छ ।
आठ वर्षदेखि भाडाको घरमा बस्दै आएको नगरपालिका कालिका–६ रेडक्रस ग्रामको चौरमा बन्दै गरेको आफ्नै भवनमा अबको तीन महिनामा सर्ने तयारी गरेको हो ।
चितवनको पूर्वी उत्तर भागमा अवस्थित यस नगरपालिका विस २०७२ असोजमा स्थापना भएदेखि भाडाको घरमा बस्दै आएको थियो । नगरपालिकाका मेयर विनोद रेग्मीका अनुसार आर्थिक वर्ष २०७६\७७ मा शिलान्यास गरी भवन निर्माण सुरु गरिएको थियो । ११ करोड ३० लाख रुपैयाँको लागतमा निर्माण भइरहेको भवन करिब सम्पन्न हुन लागेको मेयर रेग्मीले जानकारी दिए । उनले भने, ‘ अहिले मासिक करिब एक लाख रूपैयाँ बुझाउने गरी कालिका ६ कमलचोकको घरमा नगरपालिकाको कार्यालय चलाइरहेका छौँ । तर, अब भने नगरपालिकाले आफ्नै भवनबाट सेवा दिन पाउने भएको छ ।’
भवन बनेपछि भाडाको घरमा बस्नुपर्ने बाध्यताको अन्त्य हुन लागेको मेयर रेग्मीले बताए । भवन निर्माण अन्तिम चरणमा रहेको उनले बताए । अबको तीन महिनामा काम सकिने गरी काम भइरहेको भवन दुई वर्षमा निर्माण कार्य सकिने योजना भएता पनि ठेकेदार र कोभिडका कारण ढिलाई भएको रेग्मीले बताएका छन् ।
मेयर रेग्मीका अनुसार नगरबासीलाई आवत जावतमा सहजको लागि केन्द्र पर्ने गरी रेडक्रसग्रामको चौरमा सर्वदलीय सहमतिअनुसार भवन बनाउन सुरुवात गरिएको हो । उनले भने, ‘नयाँ भवनमा सरे लगतै भाडाको बोज कम हुने थियो । विभिन्न शाखाको अन्यन्त्र ठाउँबाट सेवा दिइरहेको थियो भने अब एकै ठाउँबाट सेवा दिन सकिने छ ।’
उनले नगरपालिकाले दिने सबै खाले सेवा अब एकै ठाउँबाट दिन सकिने बताए । भाडामा बसेको घरमा व्यक्तिगत रुपमा भेटघाट गरेर गुनासो गर्न नपाईने, कर्मचारी सेवाग्राहीलाई बस्न स्थानको अभाव हुने मेयर रेग्मीले सुनाए ।
नगरपालिकाका इन्जिनियर तथा पूर्वाधार विकास शाखाका प्रमुख राजेश कोइरालाले भवन निर्माण कार्य करिब सम्पन्न हुन लागेको बताए । उनले नगरपालिकाको आफ्नै स्रोत र जिल्ला समन्वय समितिबाट आएको अनुदान रकमबाट भवन निर्माण गरिएको बताए ।
करिब एक बिघा १० कठ्ठा क्षेत्रफलमा बनेको भवनमा ५ तला रहेको छ । स्थानीय सरकारको अवधारण अनुसार शाखालाई विभाजन गरी भवन बनेको छ । भवनको बनावट पूर्णरुपमा आरसीसी गरिएको हो । इञ्जिनियर कोइरालाले अबको तीन महिनामा भवन निर्माण सम्पन्न हुने बताए । उनले भवनको बनावट पूर्णरुपमा निर्माण भइसकेको तर टायल, मार्वल, रङग रोगन, झ्याल ढोका राख्ने काम भइरहेको जानकारी दिए । अबको केही दिन भित्र यी सब काम सम्पन्न हुने इन्जिनियर कोइरालाले प्रतिबद्धता जनाए ।
नगरपालिका कार्यालयमा अहिले ७७ जना कर्मचारी कार्यरत छन् । भौगोलिक हिसाबले समथर तथा केही भूभाग पहाडी क्षेत्र रहेको यस नगरपालिका सडक यातायातको पहुँचबाट नजिक रहेको छ । तल्लो भूभाग (समथर) को हरेक टोल टोलमा १२ महिना चल्न सक्ने सडक पुगेको छ । जसमा कालोपत्रे भएका सडक झण्डै ४० प्रतिशत छन् ।