गत साउनदेखि चैत २२ गतेसम्म करिब ८० हजार नेपाली विद्यार्थीले विदेशमा अध्ययन गर्न जान अनुमति पत्र (एनओसी) लिएका छन् । वैदेशिक अध्ययन अनुमति शाखा प्रमुख बासुदेव वस्तीका अनुसार साउनयता ७९ हजार ३०९ जनाले वैदेशिक अध्ययन अनुमति पत्र लिएका छन् ।
अहिले शाखाले एनओसीका लागि अनलाइन आवेदन दिएको एक दिनमा रुजु गर्ने र अर्को दिन एनओसी दिन थालेको छ । बिहीवार ६०९ अनलाइन आवेदन परेकामा ५२९ आवेदन स्वीकृत भएको छ । आवेदन स्वीकृत भएको ५ सय आवेदकले शुक्रबार एनओसी पत्र पाउनेछन् ।
विभिन्न देशमा अध्ययन गर्न जानको लागि अहिले औसतमा दैनिक ६ सय जनाले वैदेशिक अध्ययन अनुमति पत्रका लागि आवेदन दिइरहेको शाखाले जनाएको छ । शाखाले अहिले सेवा प्रवाहलाई सहज र छिटो बनाउदै लगेको दाबी गरेको छ । अनलाइनबाट आवेदन दिने, रुजु गर्ने र एनओसी पाउने समय सम्बन्धित विद्यार्थीलाई जानकारी गराउन थालेपछि लाइन बस्नेको संख्या घटेको शाखाले दाबी गरेको छ ।
शाखा प्रमुख वस्तीले एनओसी लिन आउने विद्यार्थीलाई सहज सेवा दिन सम्भव भएसम्मको कोशिस भइरहेको बताए । सेवाग्राहीको सहजताको लागि निशुल्क वाइफाइ सेवा दिने, उनले बताए ।
‘कसरी हुन्छ सेवाग्राहीलाई सहज बनाउने कोशिस गरिरहेका छौं । साथीहरुको मिहिनतले अहिले एकैदिनमा आवेदन रुजु गर्ने र अर्को दिनमा एनओसी दिनेसम्म सफल भएका छौं । अब फ्रि वाइफाइ सुविधा दिएर थप सहज बनाउने कोशिसमा छौं’ शाखा प्रमुख वस्तीले भने ।
