चितवनको भरतपुर महानगरपालिका–२७, स्थित बेतरी खोलामा रहेको पक्की पुल वि.सं.२०७१ सालमा आएको बाढीले भत्काईदियो । मेघौलीको तेलौली र साविक वडा नं.९ जोड्ने उक्त पुल भत्किदा स्थानीयले लामो समयसम्म सास्ती व्यहोर्दै आए । अब यो समस्या दुई वर्षभित्रमा हट्ने भएको छ ।
सोमबार भरतपुर महानगरपालिकाकी प्रमुख रेनु दाहालले सोही स्थानमा नयाँ पुल निर्माणको लागि शिलान्यास गरिन् । उक्त आरसीसी पुल आगामि वि.सं.२०८१ मंसिर २७ गतेभित्र सम्पन्न गरिसक्ने सम्झौता भएको छ । गत मंसिरमा पुल निर्माणका लागि जिएमआर कन्सट्रक्सन नेपाल प्रा.लि.संग सम्झौता भएको छ । यस पुलको लागत ३ करोड ३४ लाख १३ हजार रुपैयाँ रहेको सडक डिभिजिन कार्यालय भरतपुरले जनाएको छ ।
पुलको शिलान्यास गर्दै मेयर दाहालले वर्खायाममा स्थानीयले भोग्दै आएका समस्या अब समाधान हुने बताइन् । उनले महानगरले आफ्नो क्षेत्रभित्रका धेरै पुलहरु निर्माणलाई प्राथमिकतामा राखेर अघि बढेको भन्दै यस पुल निर्माणका लागि प्रधानमन्त्री पुष्पकमल दाहालको उल्लेखीय योगदान रहेको बताइन् । ‘अहिलेका प्रधानमन्त्री पुष्पकमल दाहालज्यू यसअघि यसै क्षेत्रको माननिय हुनुहुन्थ्यो, यो पुलका लागि उहाँको ठूलो योगदान छ, भरतपुरका धेरै पुल निर्माणका लागि उहाँको योगदान छ’–मेयर दाहालले भनिन् । उनले महानगर भित्रका कलभर्ट निर्माणदेखि अन्य पुल निर्माण पाँच वर्षमा धेरै सम्पन्न भइसकेको भन्दै आउँदो कार्यकाल भित्र धेरै पुलहरु निर्माण भइसक्ने बताइन् ।
यस्तै मेयर दाहालले मेघौली क्षेत्रका धेरै सडकहरुमा पीच निर्माणको काम भइरहेको र केही सम्पन्न भइसकेको बताइन् । कतिपय सडक ठेकेदार कम्पनीको ढिलासुस्तीका कारण सडक निर्माणमा ढिलाईरहेको भन्दै अब ढिलाई गर्ने छुट नभएको बताइन् । मेयर दाहाललाई स्थानीयले बाजागाजाले स्वागत गरेका थिए । पुल शिलान्यास भएपछि स्थानीयबासी निकै खुशी भएका छन् । स्थानीय लक्ष्मी पौडेल १० वर्षपछि पुल निर्माण हुन लागेको निकै खुशी लागेको बताइन् । निकै हर्षित मुद्रामा देखिएकी पौडेलले भनिन्–‘आज हामी निकै खुशी छौं, १० वर्षसम्म यो भत्केको पुल अलपत्र प¥यो, हामी जनताले निकै सास्ती भागेका थियौं, मेयर रेनु दाहालज्यूले बजेट पारेर पुल निर्माणको प्रक्रिया अघि बढाई दिँदा हामी धेरै खुशी छौं ।’
शिलान्यासस्थलमा स्थानीयको भीड लागेको थियो । त्यहि भिडमा थिए राधाकृष्ण धिताल । पुल निर्माण हुँदै गर्दा उनीमा पनि छुट्टै उत्साह थियो नै अर्कोतर्फ समयमै काम सम्पन्न नहोला कि भन्ने डर पनि । धिताल भन्छन्–‘यो पुल नहुँदा हामी धेरै दुःख पाएका छौं, यो पुल छिट्टै निर्माण होस्, समयमै सम्पन्न हुन्छ भन्नेमा आशाबादी छौं, ढिलाई भयो भने हामी खबरदारी गर्नेछौं ।’
