तमू ल्होसारको अवसरमा भरतपुरमा आयोजित रस्साकस्सी (टक अफ वार) प्रतियोगितामा ४० वर्ष माथि समूहका पुरुष प्रथम भएका छन् ।
४० वर्ष तलका र ४० वर्ष माथिका गरी ११–११ जनाको समुहमा प्रतिस्पर्धा भएको हो ।
विजेता समूहलाई भोलि ल्होसारको दिन सम्मान गरिने तमू ह्युल छोँज धीँ गुरूङ राष्ट्रिय परिषद् चितवन खेलकुद समितिका सदस्य मनिराज घलेले बताए । तमू ह्युल छोँज धीँको संग्रहालय महाबौद्ध गुम्बा परिसर (तिनखोले गुम्बा) मा प्रतियोगिता भएको थियो ।
विजयी हुनेमा गन्जहिं गुरुङ, खड्काबहादुर गुरुङ, रामबहादुर गुरुङ, खड्क सिं घले, सुला गुरुङ, लाल घले, दिनेश गुरुङ, बुद्धि गुरुङ, भरत गुरुङ, बुद्धिबहादुर गुरुङ र चित्र बहादुर गुरुङ रहेका छन् ।
तमू समुदायको साझा संस्था तमू ह्युल छोँज धीँ गुरूङ राष्ट्रिय परिषद् चितवनले विभिन्न कार्यक्रमको आयोजना गरी तमू ल्होसार पर्व मनाउँदै छ । भोलि पुस १५ गते विशेष दिन भए पनि आज १४ गते विभिन्न खेलकुद प्रतियोगिता गरेर मनाएको हो ।
साथै आज साँझ सांस्कृतिक कार्यक्रममा राष्ट्रियस्तरका कलाकारहरूको प्रस्तुति रहने आयोजकको भनाइ छ । आयोजकका अनुुसार लोक तथा दोहोरी कलाकारहरू शीतल गुरूङ, सविन गुरूङ र चिजा तामाङबाट प्रत्यक्ष दोहोरी गाउने कार्यक्रम तय भएको छ।
ल्होसार तमू समुदायको नयाँ वर्षको रुपमा समेत रहेको छ । यस दिन बाघ वर्ग (तोल्हो)लाई बिदाइ गर्दै बिरालो वर्ग (हिल्हो)लाई स्वागत गरेर यसवर्ष ल्होसार पर्व मनाउन लागिएको हो ।
