चितवन क्षेत्र नं.३ बाट स्वतन्त्र उम्मेदवारी दिएका युवा नेता तारा पौडेलले गठबन्धनका साझा उम्मेदवार डा.भोजराज अधिकारीलाई समर्थन गर्दै आफ्नो उम्मेदवारी निस्कृय भएको घोषणा गरेका छन् ।
शनिबार भरतपुरमा आयोजित गठबन्धनको विशाल आमसभामा बोल्दै स्वतन्त्र उम्मेदवार पौडेलले नेकपा (माओवादी केन्द्र)का उम्मेदवार डा.अधिकारीलाई समर्थन गर्ने घोषणा गरेका हुन् । आफूले उठाउँदै आएको एजेन्डालाई डा.अधिकारीले अघि बढाउने प्रतिवद्धता जनाएपछि आफूले उम्मेदवारी निस्कृय पारेको बताए ।
‘म कुनै नेता र नेतृत्वको विरोधमा स्वतन्त्र उम्मेदवारी दिएको थिइन्, म विकासको एजेन्डा लिएर अघि बढेको थिए, मेरो एजेन्डालाई अघि बढाउने प्रतिवद्धतापछि मैले उम्मेदवारी फिर्ता लिएको हुँ’–पौडेलले भने ।
पौडेल ठोरी–केरुङ लोकमार्ग बन्नुपर्छ भन्ने विषयलाई उजागर गर्दै आएका अभियन्ता समेत हुन् । उनी पुतली चुनाव चिन्ह लिएर प्रचार प्रसार तिव्र पारेका थिए ।
