नारायणगढको शहिदचोकदेखि बैकुण्ठचोक, धर्मचोक हुँदै कचपचे चोकसम्मपुग्ने सडक निर्माणको प्रगति तीनपटक म्याद थप्दा ७५ प्रतिशत पुगेको छ ।
चार वर्ष तीन महिनाको अवधिमा तीन पटक म्याद थप्दा पनि यस सडकको काम अझै २५ प्रतिशत बाँकी रहेको हो ।
बाँकी काम यही कात्तिक २५ गतेसम्म सक्ने निर्माण कम्पनी रमण शिवशक्ति जेभीका प्रोजेक्ट म्यानेजर रञ्जन ठाकुरले दाबी गर्नुभयो । उहाँले भन्नुभयो, ‘नाला र सबबेसको काम सकियो । नाला चेकजाँच गर्ने काम छ । र, सबबेस राम्रोसँग नसुक्दा सम्म कुर्नुपर्छ । त्यसपछि सडक कालोपत्रे गरिन्छ । १० दिनको काम हो । काक्तिक २५ गतेसम्म सकिन्छ ।’
यद्यपि जेभीले नेपाल सरकारबाट २०७९ साल चैत २५ गतेसम्मको म्याद पाएको छ । धेरै समय लागिसकेकाले अब चैत कुर्न नपर्ने ठाकुरको भनाइ छ । जेभीको अनुसार अब ४८० मिटर सडक बनाउन बाँकी छ । करिब तीन हजार १०० मिटरको यस बाटोको सम्झौता २०७५ साल वैशाख २६ गते भएको थियो ।
सघन शहरी तथा भवन निर्माण आयोजना चितवनले रमण शिव शक्ति जेभीसँग यसको सम्झौंता गरेको थियो । सम्झौता अनुसार २०७७ असार मसान्तसम्म निर्माण सक्नुपर्ने थियो । १० मिटर चौडाइको यस बाटो निमार्णको लागि सडकको दुवै तर्फ ६ देखि ७ फिट गहिरो ढल खनिएको छ ।
यो सघन शहरी विकास कार्यक्रमअन्तर्गत कालोपत्रे सडक तथा ढल निर्माण कार्य प्याकेज नं. २ अन्तर्गतको सात योजनामध्ये एक रहेको छ । जसकालागि सरकारले ९९ करोड, ९७ लाख, चार हजार ९०९ दशमलब ५२ रुपैँयाँ कुल लागत रकम अनुमान गरेको थियो । भ्याटसहित ६८ करोड, २३ लाख, १५ हजार ८२४ दशमलब १६ रुपैयाँमा सम्झौता भएको थियो । शहिदचोकदेखि बैकुण्ठ चोक, धर्मचोक र कचपचे चोकसम्मको बाटोको ठेक्का रकम भने ७१ करोड ३८ लाख ३५ हजार ५७४ रुपैयाँ रहेको शहरी विकासका इञ्जिनियर पुजन न्यौपानेले बताउनुभयो । अब २१ करोड भुक्तानी दिन बाँकी रहेको उहाँको भनाइ छ ।
