मालपोत तथा भूमिसुधार कार्यालय राजविराजका सेवाग्राहीहरूको मोटरसाइकलको हावा खोल्ने प्रहरी हवलदार राजकुमार धामीमाथि प्रहरीले अनुसन्धान थालेको छ ।
मोटरसाइकलको हावा खोलेर सेवाग्राहीलाई दुःख दिएको देखिएकोले घटनामा संलग्न प्रहरी हवलदारमाथि छानबिन सुरु गरिएको र अनुसन्धान टोली खटाएर स्पष्टीकरण सोधेको सप्तरीका प्रहरी प्रमुख प्रहरी उपरीक्षक अभिनारायण काफ्लेले जानकारी दिए । उनका अनुसार अनुसन्धान टोलीको प्रतिवेदन आउनसाथ थप कारबाही अघि बढाइनेछ ।
तोकिएको पार्किङमै राखेको प्रेस लेखिएको मोटरसाइकलको मात्र हावा खोल्नु दुःखद् घटना भएको बताउँदै एसपी काफ्लेले कानुनविपरीत कार्य गर्ने हवलदार धामीलाई कारबाहीको दायरमा ल्याउने बताए । नेपाल पत्रकार महासंघ सप्तरीले यसबारे एसपी काफ्लेको ध्यानाकर्षण गराएको थियो ।
