Breaking News
चितवनको पटिहानीमा बन्यो एक अर्बको रिसोर्ट, सोल्टी होटलको व्यवस्थापनमा सञ्चालनमा आउने
चितवन, असार २६–
चितवनको भरतपुर महानगरपालिका–२२, पटिहानीमा निर्माण सम्पन्न भएको रिभरसाइड रोयल गार्डेन साउनबाट सञ्चालनमा आउने भएको छ ।
सोल्टी होटलले सात वटै प्रदेशमा आफ्नो सेवा विस्तार गरेसँगै रिसोर्टलाई सोल्टीले १० वर्ष व्यवस्थापन गर्ने गरी लिएको हो । आज रिसोर्टमा एक सम्झौतापत्रमा हस्ताक्षर भएको छ । सोल्टी होटलका उपाध्यक्ष सुदर्शन चापागाईं र रिसोर्टका अध्यक्ष कल्याण जोशीले सम्झौतापत्रमा हस्ताक्षर गरेको रिसोर्टका प्रवन्ध निर्देशक ऋषि न्यौपानेले नारायणी अनलाइनलाई जानकारी दिए । यससँगै यो रिसोर्ट अब ‘सोल्टी वेस्टेन्ड रिसोर्ट चितवन’का नामबाट सञ्चालन हुने भएको छ । उपत्यकाबाहिर सोल्टीको नेपालगञ्जमा आफ्नै पाँचतारे होटल विस्तार भइसकेको छ ।
प्रबन्ध निर्देशक न्यौपानेको अनुसार करिब एक अर्ब लगानीमा बनेको रिसोर्टमा नेपालका २५ जना लगानीकर्ताहरु रहेका छन् । ५२ वटा कोठा र १२ भिल्लासहितको यो रिसोर्ट कूल पाँच बिघा क्षेत्रफलमा फैलिएको छ । यसमा ठूला कन्फ्ररेन्स हल, स्विमिङ पुल रहेका छन् । कोरोना अगाडि बन्न सुरु भएको यो रिसोर्ट बन्न झण्डै पाँच वर्ष लागेको छ । अब साउन ३० गतेबाट सञ्चालन गर्ने तयारी गरिएको छ । रिसोर्टमा युवराज श्रेष्ठ, विजय मल्ल, रमेश पिया, ऋषि न्यौपाने, महेन्द्रलाल प्रधान र चुँडामणि खनालको लगानी रहेको छ । खासगरी आगामी पर्यटकीय सिजनलाई लक्षित गरी रिसोर्टले सेवा थाल्ने तयारी गरेको हो ।