गुरुङ चलचित्रकी लोकप्रिय नायिका कल्पना गुरुङ एमालेबाट कास्कीको मादी गाउँपालिकाको उपप्रमुखमा उम्मेदवार बनेकी छन् ।
जि फिल्मस प्रालिबाट निर्माण गरेको गुरुङ भाषाको चलचित्र ‘प्ह्रोंछे’ बाट कलाकारिता यात्रा शुभारम्भ गरेकी गुरुङले अभियान फिल्मस प्रालिले निर्माण गरेको गुरुङ भाषाको चलचित्र ‘ङ्योए नाँसा ट्हो’ र ‘चोँ’ मा पनि मुख्य नायिकाको भूमिका निर्वाह गरी सकेकी छन् । नायिका कल्पना गुरुङ गुरुङ फिल्म एशोसिएसन नेपाल जिफानको सातौं अधिवेशन २०७८ बाट सम्मानित भएकी थिइन् । २०७९ वैशाख ३० गते हुने आसन्न निर्वाचनमा गण्डकी प्रदेश कास्की जिल्ला मादी गाउँपालिकाको उपप्रमुख पदमा नेकपा एमालेको तर्फबाट उनको उम्मेदवारी मनोनयन भएको छ ।
