भरतपुर आँखा अस्पतालले आँखामा हुने समस्याहरुका विषयमा एक दिने सचेतनामूलक कार्यक्रम गरेको छ ।
अस्पतालको ३५ औँ स्थापना दिवसको अवसरमा अस्पताल परिसरमा शुक्रबार एक दिने सचेतनामूलक कार्यक्रम गरेको हो ।
नेत्र चिकित्सक अध्ययनरत विद्यार्थीले दृष्टि दोष, आँखा दान र मोतिया बिन्दुको विषयमा अस्पताल आउने जाने सबैको जिज्ञासाको समाधान गरेका थिए ।
नेत्र चिकित्सक चौथो वर्ष विद्यार्थी प्रियांसा आचार्यले मुख्यतया सूर्यको हानीकारक किरण, उमेर, धुमपान मध्यपान गर्ने मानिस, मधुमेह, सुगर रक्तचाप हुनेहरुमा मोतिया बिन्दु हुने गरेको बताए । साथै उनले चिकित्सकको सल्लाह बिना आँखामा औषधि राख्नु पनि मोतिया बिन्दुको कारण बनेको बताए । आँखामा चोटपटक लागे वा वंशाणुगत पनि यो रोग लाग्न सक्ने उनको भनाइ छ ।
मोतिया बिन्दुको सुरुवाती चरणमा चस्मा लगाएर दृष्टि सुधार गर्न सकिने रबिन थापाले बताएका छन् । चस्माले पूर्णरुपमा निको भने पार्न नसक्ने जीकिर गरे । यसको लागि सल्यक्रिया नै गर्नुपर्ने थापाको भनाइ छ ।
तेस्रो वर्षमा अध्ययनरत मानन्धर उपाध्यायले आँखा दानको विषय सर्वसाधारणमा रहेको भ्रम अझै नमेटिएको बताए । ‘आँखा दान गरौं मृत्युन्ज्य बनौं’ भन्ने मूल नाराका साथ कार्यक्रम सञ्चालन गरिएको हो । उनले भने, ‘नानीको दान गर्नु नै आँखा दान हो । आँखाको डल्लो नै निकाल्ने होइन् । बाहिरी आँखाको पारदर्शी भाग मात्रै निकाल्ने हो । आँखा दान गरेर अर्को जन्ममा अन्धो भइन्छ भन्ने सोच भ्रम हो ।’ आँखाको दान दुई वर्ष माथि ७० वर्ष भन्दा मुनिका व्यक्तिहरुले गर्न सक्ने मानन्धरले बताए । एउटा मान्छेबाट लिइएको आँखाले दुई जनालाई दृष्टि दिनसक्ने उनको भनाइ छ ।
यस्तै त्यहाँ रहेका अर्का विद्यार्थीले दृष्टि दोषको विषयमा जानकारी दिएका थिए । अहिलेसम्म भरतपुर आँखा अस्पतालमा ८२१ जनाले आँखा दान गर्न तयार रहेको आँखा बैँककी कोर्डिनेटर छाया श्रेष्ठले बताइन् । अस्पतामा अहिलेसम्म ९६ जनाको आँखा प्रत्यारोपण भएको छ । अस्पतालका अध्यक्ष कृष्णराज धरेलले आँखामा लाग्ने रोग र समाधानको ज्ञान दिन कार्यक्रम गरिएको बताए । आँखा सम्बन्धी जिज्ञासा भएका मानिसहरु वा बिरामीहरुका लागि प्रभावकारी भएको उनको भनाइ छ ।
