सरकारले आउँदो वैशाख ३० गते स्थानीय तहको निर्वाचन घोषणा गरेसंगै चितवनमा चुनावी सरगर्मी सुरु भएको छ । सत्तारुढ दल नेपाली कांग्रेसले आज देशैभर ‘घरघर जाऔं, कांग्रेसलाई जिताऔं’ नारासहित चुनावी अभियान सुरु गरेलगत्तै चितवनको ९८ वटा वडामै अभियान सुरु भएको छ ।
कांग्रेस चितवनले ९८ वटा वडामै चुनावी अभियानका लागि प्रतिनिधि खटाएको छ । भरतपुर–२९ मा जिल्ला सदस्य अनमोल अधिकारीको संयोजकत्वमा परिचालित टिमले अभियान थालेको छ । अधिकारीको टिमले एक महिना अघि नै सो वडाको अध्यक्षको उम्मेद्वार टुंगो लगाउन सफल भएको छ । आज सुरु भएको चुनावी अभियान अन्तरगत भरतपुर–२९ को वडा अध्यक्षमा क्याप्टेन सूर्यबहादुर गुरुङ सर्वसम्मत उम्मेद्वार चयन भएका छन् । भेलाले गुरुङलाई वडा अध्यक्षको उम्मेद्वार बनाउने निर्णय गरेको संयोजक अधिकारीले जानकारी दिए ।
गुरुङ २०७४ सालको स्थानीय तहको निर्वाचनमा पनि कांग्रेसबाट वडाअध्यक्षमा लडेका थिए । त्यसबेला उनी ४२ मतले पराजित भएका थिए । अहिले पुनः गुरुङलाई नै कांग्रेसले उम्मेद्वार बनाउने भएको हो । गुरुङ कांग्रेसबाट उम्मेद्वार बन्ने पहिलो व्यक्ति बनेका छन् । अन्य वडाको अध्यक्षको उम्मेद्वार टुंगो लागेको छैन ।
चुनावी अभियानमा खटिएका संयोजक अधिकारीले सबैको सहमतिमा उम्मेद्वारी तय गरिएकाले यसपटक वडा अध्यक्ष कांग्रेसले जित्ने दावी गरे । उनले वडामा सकरात्मक उर्जासहित कांग्रेस कार्यकर्ताहरु घरदैलो अभियानमा होमिएको बताए । सो वडामा अधिकारीसंगै प्रतिनिधिको रुपमा केशव रिमाल र प्रल्हाद उप्रेती पनि खटिएका छन् ।
