बल्ल बल्ल जुटेको राष्ट्रिय प्रजातन्त्र पार्टी (राप्रपा) फेरि फुटको अवस्थामा पुगेको छ।
गत मंसिरमा भएको महाधिवेशनबाट अध्यक्षमा हारेपछि कमल थापाले पार्टी फुटाउने तयारी गरेका हुन् । यसका लागि उनले निर्वाचित अध्यक्ष राजेन्द्र लिङ्देनलाई तीन वटा माग पूरा गर्न आज अल्टिमेटम दिएका छन्। थापाले राजसंस्था छाडेर हिन्दुवादी दल खोल्ने तयारी गरेका हुन् ।
उनले आज काठमाडौँमा आफूपक्षिय नेताको भेला गरेर सरकारले स्थानीय चुनावको मिति घोषणा गर्नुअघि नै पार्टी अध्यक्ष लिङ्देनबाट आफूले उठाएका माग सम्बोधन हुनुपर्ने नभए अर्को दल खोल्ने जानकारी गराएका हुन् ।
उनले भनेका छन्–‘आज अल्टिमेटम दिएर आजै सबै माग पूरा गर्ने भन्ने त होइन तर समय एकदम कम छ । मलाई नयाँ यात्रा सिर्जना गरेर दुःख बेसाउने मन छैन। तर बाध्य बनाउनुभयो भने नयाँ यात्रा सुरू हुन्छ। म त्यो यात्रामा साथ दिन कसैलाई पनि कर गर्दिनँ, आफ्नो स्वेच्छाले निर्णय गर्नुस्, अन्तरआत्मालाई सोधेर निर्णय गर्नुस्। हामी निर्णायक घडीमा आइपुगेका छौं।’
