चितवनमा सडक नालीमा खसेर गैँडा मरेको घटनाबारे वन तथा वातावरण मन्त्रालयले गठन गरेको उच्चस्तरीय सरकारी छानबिन समितिले चितवनमा विभिन्न पक्षसँग परामर्शमा जुटेको छ ।
घटनाबारे जिल्लाका विभिन्न पक्षसँग विगत तीन दिनदेखि टोलीले छलफल तथा परामर्श गरेको हो । निकुञ्जका सूचना अधिकारी गणेशप्रसाद तिवारीले मन्त्रालयबाट आएको छानबिन समितिले विभिन्न सरोकारवालाहरुसँग चितवनमा परामर्श गरिरहेको नारायणी अनलाइनलाई बताए । उनले भने, ‘ टोलीले चितवनमा आएर काम सुरु गरेको तीन दिन भइसकेको छ । अब छिट्टै प्रतिवेदन बाहिर आउँछ । चितवन आउनु अगाडि पनि मन्त्रालयले यस घटनाको बारेमा विश्लेषण गरिरहेको थियो ।’ उनले अनुसन्धानको काम चलिरहेकोले सबै कुरा भन्न नमिल्ने बताए ।
भरतपुर महानगरपालिका प्रमुख रेनु दाहाल र प्रमुख जिल्ला अधिकारी अस्मान तामाङसँग भेटेको छ । त्यस्तै मध्यवर्ती सामुदायिक वनका पदाधिकारी, सडक डिभिजन कार्यालय, निर्माण कम्पनीका कर्मचारीसँग पनि छलफल गरेको छ ।
वनदेवी मध्यवर्ती सामुदायिक वनभित्र फराकिलो क्षेत्रमा घाँसेमैदानमा छानबिन समितिले आफ्नो अध्ययनलाई केन्द्रित गरेको छ । त्यस ठाउँमा भेटिएको रगतको टाटा र गैँडाको पाइलाको आधारमा गैँडा जुध्दा भागेर सो ठाउँमा पुगेको भन्ने प्रारम्भिक निष्कर्ष निस्केको छ । यो स्थान गैँडा मरेको घटनास्थलबाट एक किलोमिटर दक्षिणमा पर्छ । गैँडा मरेपछि टोलीले गैँडा मर्नुको कारणको खोजेको छ । घटनास्थलमा पुगेर घटनाबारे जानकारी पनि लिएको छ ।
भरतपुर महानगरपालिका– ९ स्थित गोन्द्राङमा सडकमा बनाइएको नालीको छेउको खाडलमा परेर गत आइतबार अन्दाजी १२ वर्षको भाले गैँडा मरेको थियो । टोलीको प्ररम्भिक निष्कर्षमा दुईवटा भाले गैँडा जुधेको जस्तो देखिएको छ । जुधेको स्थान एक किलोमिटरसम्म छ । यो हेर्दा टाढाबाट लखेटिएर भागेको हुनसक्ने प्रारम्भिक निष्कर्ष छ । बयष्क भएपछि र पोथीसँग संसर्गको बेला गैँडा आपसमा जुध्ने गर्छन् । कहिलेकाहीँ सहवासमा पोथीले इन्कार गरेको अवस्थामा पनि भालेले पोथीलाई लखेट्छ ।
छानबिन समितिमा मन्त्रालयका कानुन उपसचिव रामजी दनाई, विभागका योजना अधिकृत दिलबहादुर उर्जापुन, चितवन राष्ट्रिय निकुञ्जका प्रमुख संरक्षण अधिकृत हरिभद्र आचार्य, डिभिजन वन कार्यालय चितवनका प्रमुख पदमराज नेपाल छन् । छानबिन समितिले १० दिनभित्र प्रतिवेदन बुझाउने गरी काम गरेको छ ।
चितवन राष्ट्रिय निकुञ्जले पनि यस विषयमा छुट्टै अनुसन्धान अनुसन्धान अगाडि बढाएको छ । सहायक संरक्षण अधिकृत राजु घिमिरेलाई अनुसन्धान अधिकृत तोकेर अनुसन्धान प्रक्रिया अघि बढाएको हो । सडक विस्तारका क्रममा निर्माणाधीन नालीको खाल्डोमा परेर गैँडा मरेपछि निकुञ्जले निर्माण कम्पनी इन्डो सगुन जेभीका सञ्चालक सहदेव खड्कालाई पक्राउ पुर्जी जारी गरे पनि उनी भने पक्राउ परेका छैनन्।
