पूर्वीचितवनको रत्ननगर नगरपालिका वडा नं. १३ घर भई हाल भरतपुर महानगरपालिका वडा नं. २३ मा मनकामना वर्कसप तथा रिकण्डिसन हाउस संचालन गर्छन् ३८ वर्षीय दिपेन्द्र कुमार श्रेष्ठ । उनलाई चितवन प्रहरीले मोटरसाइकल चोरीको अभियोगमा पक्राउ गरेको छ ।
श्रेष्ठ पहिलोपटक चोरी मुद्धामा भने पक्राउ परेका होइनन् । उनी पटक–पटक पक्राउ पर्दै छुट्दै गरेको चितवन प्रहरीले जनाएको छ । यसअघि पक्राउ परेका श्रेष्ठलाई अनुसन्धान पश्चात प्रहरीले छाडेको थियो । तर चोरीका मोटरसाइकल फेरि उनकै रिकण्डिसन हाउसमा पुग्न थालेपछि श्रेष्ठ प्रहरीको निगरानीमा रहेका थिए । प्रहरीको एउटा टोली मोटरसाइकल चोरी गर्ने गिरोह पक्राउ गर्ने मिसन चलाएपछि उनी फेरि पक्राउ परेको जिल्ला प्रहरी कार्यालय चितवनका प्रवक्ता नरहरि अधिकारीले जानकारी दिए ।
श्रेष्ठसहित पक्राउ परेका ६ जनालाई प्रहरीले आज (बिहीबार) विहान सार्वजनिक गरेको छ । उनीहरुको साथबाट प्रहरीले ४ वटा मोटरसाइकल समेत बरामद गरेको छ ।
प्रहरीले श्रेष्ठसंगै पूर्वीचितवनको कालिका नगरपालिका वडा नं. ५ बस्ने २० वर्षीय मंशिस चौधरीलाई समेत पक्राउ गर्यो । प्रहरीले उनको साथबाट लागु औषध ट्याबलेट समेत बरामद गरेको छ । उनको साथबाट ४ पत्ता (५२ ट्याब्लेट) लागूऔषध फेला परेकाले प्रहरीले उनको अनुसन्धान चोरी अभियोगसंगै लागूऔषध तर्फसमेत अघि बढाएको छ ।
