सहयोगापेक्षी सडकआश्रित मानवहरुको सेवामा समर्पित मानवसेवा आश्रम चितवन शाखाको भवननिर्माणका लागि आज (आइतबार)देखि श्रीमद्भागवत ज्ञानविज्ञान महायज्ञ सुरु भएको छ ।
भरतपुर–३, बेलचोकमा आश्रमलाई जग्गा प्रदान गर्ने स्व. भगवानदास श्रेष्ठकी श्रीमती कल्याणी श्रेष्ठ, महायज्ञका संयोजक प्रेमकुमार श्रेष्ठ र महायज्ञका प्रमुख वाचक भागवत भाष्कर कमलनयन गौतमले संयुक्त समुद्घाटन गरेका थिए ।
हाल मानवसेवा आश्रमको सेवा भरतपुर महानगरपालिका–१०, बाइपास रोडमा सञ्चालनमा छ । आश्रमको आफ्नै संरचनामा स्थानान्तरण गर्नका लागि भरतपुर –३, बेलचोकमा संरचना निर्माण भइरहेको छ । जग्गा भरतपुर निवासी समाजसेवी स्व. भगवानदास श्रेष्ठको स्मृतीमा श्रीमती कल्याणी श्रेष्ठ र पारिवारले ६ कठ्ठा र उनका ठुलो दाजु प्रेमकुमार श्रेष्ठले २ कठ्ठा गरि ८ कठ्ठा जग्गा सहयोग गरेका हुन् ।
महायज्ञको पहिलो दिन एक कोठा निर्माण अभियान अन्तर्गत १५ वटा कोठाको प्रतिबद्धता मिलेको छ। अभियान अन्तर्गत एक कोठा निर्माणका लागि ५ लाख ११ हजार १ सय ११ रुपैयाँ वा त्यो भन्दा माथिको योगदान गरेपछि कोठाको बाहिर दाताको चाहना अनुसार कोठामा नामाङ्करण गरिने मानवसेवा आश्रमका महासचिव सुशिला के.सी (रुपा) ले जानकारी दिइन् । महायज्ञको समुद्घाटनको दिन ९६ लाख रुपैयाँ जुटेको आश्रमका अध्यक्ष रामजी अधिकारीले जानकारी दिए । यसका लागि १५ कोठा निर्माण गर्न ५ लाख ११ हजार १ सय ११ रुपैयाँ र दुईवटा हल निर्माणका लागि १० लाख ११ हजार १ सय ११ रुपैयाँ जुटेको छ ।
त्यस्तै यस महायज्ञबाट १० करोडको अपेक्षा रहेको यस महायज्ञका संयोजक प्रेमकुमार श्रेष्ठले बताए ।
अहिलेसम्म आश्रमको संरचनाको सम्पूर्ण व्यवस्थापन गरि आवश्यक सामग्री जोडेर गृह प्रवेश गराउनका लागि ५ करोड र आश्रमको नियमित व्यवस्थापनका लागि ५ करोड जुटाउने लक्ष्य रहेको छ ।
आश्रमले पौष ४ गतेसम्म हरेक दिन बिहान ७ः३० बजेदेखि पूजा पाठपारायण र ११ बजेदेखि कथा वाचन हुने जानकारी दिएको छ ।
कार्यक्रममा आश्रमका जग्गादाता समाजसेवी स्व. भगवानदास श्रेष्ठ, र मानवसेवा आश्रमको भवननिर्माणको लागि संयोजकको जिम्मेवारीमा रहँदा नै कोभिडको कारण निधन भएका कृष्ण कुमार श्रेष्ठको फोटोमा माल्यार्पण गरि कार्यक्रमको समुद्घाटन गरिएको थियो ।
