नवलपरासी पूर्व गैंडाकोट नगरपालिका–२ मा रहेको अक्सफोर्ड कलेज अफ इन्जिनियरिङ एण्ड म्यानेजमेन्ट कलेज फेरि अर्को अन्तर्राष्ट्रिय अवार्ड प्राप्त गरेको छ ।
कलेजले आज (बुधबार) पत्रकार सम्मेलन गरि कलेजले दि क्वालिटी अचिभमेन्ट अवार्ड २०२१ प्राप्त गर्न सफल भएकोे जनाएको छ । कलेजका प्रमुख इन्जिनियर हरि भण्डारीले गुणस्तर अनुसन्धानका लागि युरोपेली समाज (ESQR) संस्थाले गुणस्तरीय उपलब्धि पुरस्कार (ESQR Award) प्रदान गरेको जानकारी दिए । सो अवार्ड यही मंसिर २५ गते युएईमा प्रदान गर्न लागिएको हो । यसका लागि कलेजका प्रमुखसहित १६ जनाको टोली भोलि (बिहीबार) युएई प्रस्थान गर्दैछ ।
यस अवार्ड हालसम्म बीएम डब्लु ग्रुप, एयर क्यानडा, डेल्टा एयर अमेरिकालगायत विश्वका चर्चित ८३ वटा संस्थाले प्राप्त गरि सकेका छन् । यो अवार्ड प्राप्त गर्ने अक्सफोर्ड नेपालकै पहिलो संस्था भएको छ । स्वीजरल्याण्डमा मुख्य कार्यालय रहेको यस संस्थाले संसारभरका कम्पनी, सार्वजनिक प्रशासन, र अन्य संस्थाहरुको गुणस्तर सम्बन्धी चेतना अभिवृद्धि गर्ने, गुणस्तरबाट छानिएका संसारभरका संस्थाहरुलाई सम्मान तथा पुरस्कृत गर्ने गरेको छ ।
अक्सफोर्ड कलेजले यो अवार्डसहित हालसम्म स्वदेशी तथा विदेशी गरि १८ वटा अवार्ड प्राप्त गर्न सफल भएको छ । कलेजका प्रमुख भण्डारीले यस प्रकारको अवार्डले कलेजको स्तर बढाउनुको साथै अध्ययनर विद्यार्थीहरुलाई अन्तर्राष्ट्रिय बजारमा बिकाउन सफल हुने बताए । अन्तर्राष्ट्रिस्तरमा अक्सफोर्डका नाम समावेश हुने भएकाले विद्यार्थीहरुलाई उच्च शिक्षादेखि अन्य उपलब्धिका लागि अवार्डले महत्वपूर्ण सहयोग पु¥याउने बताए । ‘अवार्डले कलेजको गरिमा त बढाउ छ नै, अन्तर्राष्ट्रिय बजारमा हाम्रा विद्यार्थीको महत्व पनि बढाउँछ’–कलेजका प्रमुख भण्डारीले भने ।
पोखरा विश्वविद्यालयबाट मान्यता प्राप्त यस कलेजले विश्वविद्यालयबाट सर्वाधिक गोल्डमेडल पाउने कलेजमा पर्दछ । वि.सं.२०५७ सालमा पोखरा विश्वविद्यालयबाट बीसीए र तत्कालिन उच्च माध्यमिक शिक्षा परिषद्बाट प्लस टु (व्यवस्थापन र कम्प्युटर विज्ञान) मान्यता लिई कलेजमा अध्यापन सुरु भएको थियो । यस कलेजमा हाल २ हजार २ सय भन्दा बढी विद्यार्थी अध्ययनरत छन् । कलेजले सरकारी नियम अनुसार १० प्रतिशत विद्यार्थीलाई पूर्ण छात्रवृत्तिमा अध्यापन गराउँदै आएको छ ।
