पुरुष टी–२० विश्वकप क्रिकेट आजदेखि सुरु भएको छ। कोरोना महामारीका कारण २०२० मा हुन नसकेको यो प्रतियोगिता संयुक्त अरब इमिरेट्स (यूएई) र ओमानमा सुरु भएको हो ।
विश्वकपको उद्घाटन खेलमा घरेलु टोली ओमानले शानदार जित हात पारेको छ । पपुवा न्यूगिनी (पीएनजी)लाई १० विकेटले पराजित गर्दै ओमानले विश्वकपमा विजयी सुरुवात गरेको हो । पीएनजीले दिएको १३० रनको लक्ष्य पछ्याएको ओमानले १३.४ ओभरमा बिना कुनै विकेट १३१ रन बनाउँदै जित हात पार्यो । ओपनर जितन्दर सिंहले छक्का प्रहार गर्दै टिमलाई जित दिलाए । उनी ७३ रनमा अविजित रहे । ४२ बल खेलेका जितन्दरले ४ छक्का र ७ चौका प्रहार गरे । यस्तै अकिब इल्यासले ५० रनको अर्धशतकिय पारी खेले । ४३ बल खेलेका अकिबले ५ चौका र एक छक्का प्रहार गरे ।
यसअघि टस हारेर पहिले व्याटिङ गरेको पीनएजीले निर्धारित ओभरमा ९ विकेट गुमाउँदै १२९ रन जोडेका थिए । पीएनजीका लागि कप्तान अशाद भालाले सर्वाधिक ५६ रनको अर्धशतकीय पारी खेले । चार्लेस अमिनीले ३७ रन बनाए । अन्य व्याट्सम्यानले उल्लेखीय प्रदर्शन गर्न सकेनन् । पीएनजीको सुरुवात राम्रो थिएन । उसले खाता नखोल्दै २ विकेट गुमाएको थियो । पीएनजीको पारी भाला र अमिनीले उकासेका थिए । यी दुईले तेस्रो विकेटका लागि ८१ रनको साझेदारी गरेका थिए ।
ओमानका लागि जसिन मास्कुदले सर्वाधिक ४ विकेट लिए भने विलाल खान र कलिमुल्लाहले समान २÷२ विकेट लिए । खेलमा ४ विकेट लिएका जसिन म्यान अफदि म्याच बने । जितसंगै ओमान समूहको शीर्ष स्थानमा रहेको छ । समूह ‘बी’ ओमानसंगै पीएनजी, बंगलादेश र स्कटल्याण्ड रहेका छन् ।
ओमानमा पहिलो चरणका खेलहरु हुनेछन् । पहिलो चरणमा कुल ८ टिमले प्रतिस्पर्धा गर्नेछ । जसमध्ये ४ टिम सुपर १२ मा प्रवेश गर्नेछ । यो प्रतियोगिता २९ दिनसम्म चल्नेछ र, २८ कात्तिक (१४ नोभेम्बर)मा हुने फाइनलले वल्र्ड च्याम्पियन तय गर्नेछ ।
समूह ए: आयरल्याण्ड, नामिबिया, नेदरल्याण्ड्स र श्रीलंका
समूह बी: बंगलादेश, ओमान, पपुवा न्यूगिनी र स्कटल्याण्ड
सुपर १२ मा पनि दुई समूह हुनेछ । पहिलो समूहमा अष्ट्रेलिया, इंग्ल्याण्ड, दक्षिण अफ्रिका र वेष्ट इण्डिजका साथै समूह एको शीर्ष र समूह बीको दोस्रो टिम हुनेछ भने अर्को समूहमा भारत, पाकिस्तान, न्यूजिल्याण्ड र अफगानिस्तानका साथै समूह एको दोस्रो र समूह बीको शीर्ष टिम थप हुनेछ ।
यो राउण्डको खेल ६ कात्तिक (२३ अक्टोबर)देखि सुरु हुनेछ र २२ कात्तिक (८ नोभेम्बर) सम्म चल्नेछ । हरेक समूहका शीर्ष दुई टोली सेमिफाइनलमा पुग्नेछन् । २४ र २५ कात्तिक (१०÷११ नोभेम्बर)मा सेमिफाइनल खेल हुनेछ ।
