भरतपुर महानगरपालिकाले आर्थिक वर्ष २०७७ र ०७८को वार्षिक समीक्षा बैठक गरेको छ ।
गत आर्थिक वर्षमा महानगरपालिकाले गरेका सम्पूर्ण कामहरूको प्रगति, त्यसको प्रभाव र समस्याहरूको समीक्षा गरी असल अभ्यासलाई यस आर्थिक वर्षमा प्रभावकारी ढंगले काम अगाडि बढाउन सहयोग पुग्ने महानगरपालिकाले बताएको छ । महानगर परिसरमा सम्पन्न समीक्षा कार्यक्रममा २९ वडाका सचिवहरूले गत आर्थिक बर्षमा भएका सम्पूर्ण कामहरूको प्रगति, चुनौती र सम्भावनाका बिषयमा प्रस्तुति राखेका थिए।
उक्त अवसरमा महाशाखा प्रमुख तथा शाखा प्रमुखहरूले महाशाखाहरूले गरेका गतिविधिहरु प्रस्तुत गरेका थिए । योजनाहरूको छनोट समयमै मूल्याङ्कन र अनुगमनका साथै भूक्तानी प्रक्रियालाई सरल बनाउने र आन्तरिक नियन्त्रण प्रणालीको विकास गर्दै न्यूनीकरण गर्दै लैजाने समीक्षा बैठकमा छलफल भएको थियो । सो अवसरमा राजस्व असुली, करका दर र दायराहरूको विस्तार र विकासका साथै सामाजिक सुरक्षा र सुशासन प्रवाह गर्न भूमिका खेल्ने बताइएको छ ।
वार्षीक समीक्षा कार्यक्रममा भरतपुर महानगरपालिका प्रमुख रेनु दाहालले समग्रमा आर्थिक वर्ष २०७७ र ०७८ उपलब्धीमूलक रहेको भन्दै चालु आर्थिक वर्षमा गत आर्थिक वर्षमा गर्न नसकिएका समग्र विकास निर्माण तथा सेवाप्रवाहलाई प्रभावकारी ढंगले अगाडि बढाउन सम्पूर्ण कर्मचारीलाई निर्देशन समेत दिएकी थिइन् । प्रमुख दाहालले जिम्मेवार भई सेवा प्रवाह र सुशासन कार्य गर्न आग्रह गर्दै दैनिक परिणाम देखिने गरी काम अगाडि बढाउन आग्रह गरेकी छन् ।
प्रमुख दाहालले आफू र जन प्रतिनिधीहरूले हर तवरको सहयोग पु¥याउने बताउँदै उच्च मनोवलका साथ कार्य सम्पादनमा लाग्न आग्रह गरेकी थिइन् । बितेको चार वर्षमा आफूले समग्र भरतपुरको विकासका लागि उल्लेखनीय कामहरू गरेको बताउँदै केही बाँकी रहेका योजनाहरू पनि यस आर्थिक वर्षमा अगाडि बढ्ने बताइन् ।
कार्यक्रममा उपप्रमुख पार्बती शाह ठकुरीले व्यवस्थित ढंगले योजना बनाएर परिणाम देखिने गरी काम अगाडि बढाउन सबैको जोड हुनपर्ने बताइन् । सो अवसरमा प्रमुख प्रशासकीय अधिकृत भोजराज खतिवडाले प्रगति समीक्षा समग्रमा उत्साहजनक रहेको भन्दै योजनाबद्ध ढंगले चालु आर्थिक वर्षका गतिविधिहरू अगाडी बढाएर काम गर्न कर्मचारीलाई आग्रह गरेका थिए । वार्षिक समीक्षा बैठकमा वडा अध्यक्षहरूका साथै शाखा, महाशाखाका कर्मचारीहरूले विषयगत समीक्षा,समस्या र समाधानका विषयहरु प्रस्तुत गरेका थिए।
