– हिरालाल आचार्य ‘डायमण्ड’ चितवन, साउन ८
चितवनमा ९ लाखका लागि आफ्नै साथीको हत्या गर्ने नेपाली सेनाका एक जना पक्राउ परेका छन् ।
नेपाली सेनाको दि फेमस महिन्द्र दल गण शिवपुरीमा कार्यरत रहेका गंगाधर ढकालले सोही गणमा कार्यरत जवान भरत गुरुङको हत्या गरेको जिल्ला प्रहरी कार्यालय चितवनले शुक्रबार पत्रकार सम्मेलन गरी जानकारी दिएको छ ।
हिजो बिहीबार बिहान भरतको शव भरतपुर महानगरपालिका वडा नम्बर १७ सिमलडाडामा नहरमा फेला परेको थियो । ३६ वर्षीय भरत धादिङ निलकण्ठ नगरपालिका निवासी हुन् । भरतको टाउकोमा गोली लागेको थियो ।
जिल्ला प्रहरी कार्यालय चितवनका प्रमुख ओम अधिकारीले गंगाधरलाई हिजो भरतपुर १८ चनौलीबाट पक्राउ गरिएको जानकारी दिए ।
घटनास्थलबाट एक थान गोलीको खोका बरामद गरिएको अधिकारीले जनाए । यस्तै घटनामा प्रयोग गरिएको मोटरसाइकल, बन्दुक, गोली समेत बरामद गरिएको एसपी अधिकारीले जनाए ।
९ लाख रुपैयाँका लागि ग्यानेन्द्रले आफ्नै साथिको हत्या गरेको पाइएको एसपी अधिकारीले बताए । भरतको बैंकमा रहेको रकम गंगाधरले किर्ते गरेर निकालेको र पैसा निकालेपछि भरतको हत्या गरेको पाइएको उनले बताए । भरतको बैंकबाट पैसा निकालेर गंगाधरले आफ्नो घरमा दिएको पाइएको र सो रकम समेत बरामद गरिएको एसपी अधिकारीले जनाए । घटनाबारे थप अनुसन्धान जारी रहेको उनले बताए ।
