चितवनका युवा व्यवसायी कृष्ण सापकोटा नेपाली युवा उद्यमी मञ्चको केन्द्रीय सदस्यमा चयन भएका छन् । मञ्चको शुक्रबार सम्पन्न १७ औं वार्षिक साधारण सभा तथा अधिवेशनबाट सापकोटा सर्वसम्मत सदस्यमा चयन भएका हुन् ।
सापकोटा चितवनको लोकप्रिय वैष्णव मिष्ठान्न भण्डारका संचालक हुन् । उनी नेपाली युवा उद्यमी मञ्च चितवनको पूर्व अध्यक्ष समेत हुन् । सामाजिक कार्यमा रुची राख्ने सापकोटा हरेक दुःख, सुखमा साथ दिने गरेका छन् । गतवर्षको लकडाउनमा उनै सापकोटाको अगुवाईमा मञ्चले पैदल हिडेर घर फर्किने यात्रुहरुलाई नारायणगढको पुलचोकमा खाना खुवाएको थियो ।
यस्तै मञ्चको केन्द्रीय अध्यक्षमा उदीप श्रेष्ठ चयन भएका छन् । मञ्चको प्रथम उपाध्यक्षमा रितेश लामिछाने, द्धितिय उपाध्यक्षमा साहारा जोशी, महिला उपाध्यक्षमा निभिता प्रधान, च्याप्टरतर्फको उपाध्यक्षमा सुमोद मान सैजु र महिला उपाध्यक्षमा निभिता प्रधान चयन भएका छन्। समितिको सदस्यहरुमा सापकोटासंगै कौशल सुन्दर श्रेष्ठ, पवित्रा बहादुर गौतम, रिचा श्रेष्ठ, सुदिप घिमिरे चयन भएका छन् ।
यस समितिको कार्यकाल एक वर्षको हुने छ । सरकारसँग मिलेर युवा उद्यमीलाई प्रोत्साहन गर्दै युवाहरुलाई उद्यमी बनाउने कार्यमा आफू कटिबद्ध भएर लाग्ने नवनिर्वाचित अध्यक्ष श्रेष्ठले बताए । पञ्चकन्या ग्रुपका कार्यकारी निर्देशक समेत रहेका श्रेष्ठले युवाहरुलाई उद्योगतर्फ आकर्षित गर्न सके मात्रै देशको विकास र रोजगारी सिर्जना हुने बताए ।
