नेकपा (एमाले)को सुदूरपश्चिम प्रदेश संसदीय दलको बैठक कोरम नपुगेपछि स्थगित भएको छ ।
एमालेले सरकारलाई दिएको समर्थन फिर्ता लिने निर्णय गरेपछि प्रदेश संसदीय दलको बैठक बसेको थियो । तर समसामयिक विषयमा छलफल गर्न भनेर बोलाएको बैठक कोरम नपुगेपछि स्थगित भएको आन्तरिक मामिला तथा कानूनमन्त्री समेत रहेका संसदीय दलका नेता प्रकाशबहादुर शाहले जानकारी दिए ।
शाह आफैंले माधवकुमार नेपाल समूहका प्रदेशसभा सदस्यहरुलाई टेलिफोन गरेर मंगलबार बिहान दलको कार्यालयमा बोलाएका थिए । तर विहान बढीमा ९ जना र दिउँसो समेत संख्या नबढेपछि बैठक स्थगित गरिएको हो ।
सुदूरपश्चिम प्रदेशसभामा एमालेका २५ जना प्रदेशसभा सदस्य छन् । सभामुखबाहेक १७ जना नेपाल समूहका छन् भने ७ जना ओली समूहतिर छन् । तर मंगलबार बोलाइएको संसदीय दलको बैठकमा भने माधव पक्षलाई कोरम पुर्याउन नै मुस्किल पर्यो । बैठकमा सहभागी हुन १२ जना प्रदेशसभा सदस्य मात्रै पुगेको दाबी गरिएको छ ।
