जिल्ला प्रशासन कार्यालय चितवनले निषेधाज्ञा अवधिमा वित्तिय संस्थामा समेत थप कडाइ गर्ने निर्णय गरेको छ ।
डिसिसिएमको सिफारिस अनुसार जिल्ला प्रशासन कार्यालय चितवनले जेठ १३ गतेसम्म थप गरेको निषेधाज्ञा अवधिमा वाणिज्य बैंकहरुलाई मात्रै संचालन गर्न दिने निर्णय गरेको छ । वाणिज्य बैंकहरु सातामा तीन दिन मात्रै खोल्न दिने निर्णय भएको प्रमुख जिल्ला अधिकारी प्रेमलाल लामिछानेले नारायणी अनलाइनलाई जानकारी दिए ।
‘केन्द्रीय सर्कुलर अनुसार नै सहकारीलाई पूर्ण रुपमा बन्द गर्न निर्देशन आएको छ, वाणिज्य बैंकहरु मात्रै केही दिन खोल्न पाउने निर्णय गरेका छौं’–प्रजिअ लामिछानोले भने ।
जनस्वास्थ्यका मापदण्डको अनिवार्य रुपमा पालना गराई वाणिज्य बैंकहरुलाई साताको तीन दिन आइतबार, मंगलबार र बिहीबार मात्रै सेवा दिन पाउने छन् । त्यसका लागि बैंकहरुले न्यूनतम कर्मचारी मात्रै खटाउन पाउने छन् । अन्य दिन बैंक पूर्ण रुपमा बन्द हुने छ । पहिलो चरणको निषेधाज्ञाको अवधिमा बैंकहरुमा निकै भिडभाड हुने गरेको गुनासो बढेको थियो । पहिलो चरणको निषेधाज्ञाको अवधि भोलि (शनिबार) सकिदैछ । सोही अनुरुप जिल्ला प्रशासनले जेठ १३ गतेसम्म निषेधाज्ञाको अवधि थप गरेको छ ।
