चितवनमा कोरोना संक्रमण दिनप्रतिदिन दुई गुनाले वृद्धि हुँदै गएको छ ।
हिजो सोमबार १६६ जनामा देखिएको संक्रमण आज झण्डै दोब्बर थप २३३ जनामा देखिएको छ । जनस्वास्थ्य कार्यालय चितवनका अनुसार संक्रमित २३३ जना मध्ये १८८ जना भरतपुर महानगरपालिकाका रहेका छन् । त्यसैगरी विगत २४ घण्टामा खैरहनी नगरपालिकामा ९ जना, माडी नगरपालिकामा ४ जना, रत्ननगर नगरपालिकामा २१ जना, राप्तीमा ३ जना र कालिका नगरपालिकामा थप ८ जनालाई कोरोना संक्रमण देखिएको छ ।
योसँगै चितवनमा संक्रमितको संख्या आठ हजार ४४५ जना पुगेको छ जसमध्ये १२१ जनाले कारोना संक्रमणको कारणले ज्यान गुमाएका छन् । घरमा आइसोलेसनमा एक हजार ३१५ जना छन् भने अस्पतालको आइसोलेसनमा ८९ जना रहेका छन् ।
