एनसेल आजियाटा लिमिटेडले व्यवसायिक सामाजिक उत्तरदायित्वअन्तर्गत नागरिकमा कोरोनासम्बन्धी जनसचेतना फैलाउने उद्देश्यले स्वास्थ्य तथा जनसंख्या मन्त्रालय र यूनीसेफ नेपालसँग सहकार्य गरेको छ ।
कम्पनीले प्रेषित गरेको विज्ञप्तिअनुसार कोरोना भाइरससम्बन्धी जनसचेतना अभिवृद्धिको अभियानमा नेपाल सरकारद्वारा प्रमाणित तथा सिफारिस गरिएको कोरोनाभाइरसबाट बच्न र बचाउन अपनाउनुपर्ने तीन मुख्य उपायहरु—व्यक्ति व्यक्तिबीच कम्तीमा दुई मिटर दूरी कायम गर्ने, घरबाट बाहिर निस्किँदा अनिवार्य मास्क प्रयोग गर्ने र बेलाबेलामा साबुनपानीले मिचिमिची कम्तीमा २० सेकेण्डसम्म हात धुने सन्देशलाई व्यापकरुपमा फैलाइने जनाइएको छ । यस अभियानअन्तर्गत एनसेलले मास्कको सही प्रयोग, मास्क कसरी लगाउने, कस्तो किसिमको मास्क प्रयोग गर्ने भन्ने लगायतका विभिन्न जान्नै पर्ने जानकारीहरु समावेश गरी कोरोनाभाइरसको संक्रमणबाट बच्न र बचाउन पनि जनचेतना जगाउने कार्य गरिरहेको विज्ञप्तिमा उल्लेख छ ।
।
सहकार्यबारे धारणा राख्दै एनसेलका प्रमुख कार्यकारी अधिकृत एन्डी चोङले भने, ‘यस विषम परिस्थितिमा, स्वास्थ्य तथा जनसंख्या मन्त्रालय र यूनीसेफसँग सहकार्य गर्दै हाल तीव्रगतिमा फैलिरहेको कोरोना संक्रमण रोक्न, पत्ता लगाउन र यसको प्रतिकार्यमा लाग्नका लागि जनचेतना फैलाउन हामी प्रतिबद्ध छौं । निजी क्षेत्रको एक जिम्मेवार व्यवसायिक नागरिकका रुपमा एनसेलले जनमानस माझ कोरोनाका बारेमा जनचेतना जगाउन र यस महामारी र यसको प्रतिकार्य तयारीका निमित्त सचेत गराउँदै आफ्नो तर्फबाट अभिन्न भूमिका निर्वाह गर्दै आएको छ । कोरोना जस्तो संकटको सामना गर्नको लागि विभिन्न सरोकारवालासँगको सहकार्य आवश्यक पर्छ जसले गर्दा सबै एकजुट भएर गरेको सहयोगले सरकारको कोरोना विरुद्घको अभियानमा ठूलो सहयोग पुग्छ । कोरोना विरुद्घ एनसेलले गरेको योगदान निजी क्षेत्रले आफ्नो विषेशज्ञता, अनुभव, क्षमता तथा दक्षताका आधारमा कसरी सहयोग गर्न सक्छ भन्ने मात्र एउटा उदाहरण हो । नेपाली जनताको सेवा गर्ने हाम्रो प्रतिबद्धतामा कुनै सम्झौता हुँदैन ।’
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले कोभिड विरुद्धको यस सहकार्यका बारेमा धारणा राख्दै भने, ‘पूरै विश्वनै यस स्वास्थ्य संकटको विषम परिस्थितिबाट गुज्रिरहेको अवस्थामा, जनस्वास्थ्यसम्बन्धी जनसचेतनामूलक कार्यहरुले प्रमुख भूमिका राख्छ । कोरोना महामारीको संक्रमण फैलिरहेको बेलामा यसको नियन्त्रण तथा रोकथामको लागि एनसेलले जनस्वास्थ्यसम्बन्धी जनचेतना फैलाउन पु¥याएको सहयोगको हामी सरह्ना गर्दछौं । कोरोनाभाइरस महामारीको प्रतिकार्यका लागि पूरा विश्वमा नै सरकारहरु, एनसेल जस्ता निजी क्षेत्रहरु र यूनीसेफ जस्ता संस्थाहरु एकजुट भई यसको रोकथामको लागि कार्यहरु गरिरहेका छन् । हालको अवस्थामा कोरोना प्रतिकार्यका लागि नयाँ समाधान र विशेषज्ञताका साथ डटेर लड्न यस किसिमको सहकार्य अपरिहार्य छ ।’
‘कोभिड–१९ बालबालिका, परिवार तथा पूरै विश्वभरका समुदायको लागि सार्वजनिक स्वास्थ्य संकटको रुपमा रहेको छ । यूनीसेफले नेपाल सरकारसँगको सहकार्यमा यस महामारीसँग लड्न काम गरिरहेको छ र एनसेल जस्ता विभिन्न निजी संस्थासँगको सहकार्यले कोरोना विरुद्घको अभियानमा वास्तवमै ठूलो महत्व राख्दछ । विशेषत यस संकटको समयमा मानिसहरुलाई कोरोनाबाट बच्ने महत्वपूर्ण सन्देशहरु प्रवाहमा गरिएको सहयोग निकैनै महत्वपूर्ण छ’, नेपालका लागि यूनीसेफका प्रतिनिधि एल्के विस्चले उल्लेख गरेको विज्ञप्तिमा जनाइएको छ ।
एनसेलले जनस्वास्थ्य सम्बन्धी जनसचेतना अभिवृद्घिमा सहयोग गर्ने प्रतिबद्घताका साथ स्वास्थ्य तथा जनसंख्या मन्त्रालय र राष्ट्रिय स्वास्थ्य शिक्षा, सूचना तथा सञ्चार केन्द्रसँग समझदारी पत्रमा हस्ताक्षर गरेको छ । साथै एनसेलले जनसचेतना जगाउने कार्यका लागि युनिसेफ नेपालसँग पनि समझदारी पत्रमा हस्ताक्षर गरेको छ । कोरोनाभाइरससम्बन्धी जनसचेतना अभिवृद्घि अभियानमा एनसेलले बहिरा कलाकार सुजल बमको साथ लिई महत्वपूर्ण तीन सन्देशलाई अझै फराकिलो रुपमा समाजमा रहेका सबै वर्गमाझ यीे सन्देशहरु पु¥याउने काम गरिरहेको छ । कोराना संक्रमणबाट बच्न र बचाउन यी सन्देशहरु एनसेलले आम सञ्चारका विभिन्न माध्यमबाट समाजका हरेक तह र तप्कासम्म पु¥याउने काम गरिरहेको छ ।
कोरोनाभाइरस विरुद्घको पहलअन्तर्गत नै एनसेलले सरकारको कोरोना भाइरस (कोभिड–१९) संक्रमण रोकथाम, नियन्त्रण तथा उपचार कोषमा अत्यावश्यक व्यक्तिगत सुरक्षा उपकरण (पीपीई), स्वास्थ्य सामग्री, पीसीआर परीक्षण किट किन्न तथा क्वारेन्टाइनका साथै संक्रमित बिरामीको उपचारार्थ १० करोड योगदान गरेको विज्ञप्तिमा उल्लेख छ । यसका साथै कम्पनीले कोभिड–१९ विपद् व्यवस्थापन केन्द«लाई कन्ट्याक्ट ट्रेसिङमा सहयोग पु¥याउँदै आएको छ र साथै वैशाख २०७७ देखि नै यूएसएसडी सर्वेक्षणबाट कोरोना संक्रमित पत्ता लगाउन पनि मद्दत पु¥याउँदै आएको कम्पनीले जनाएको छ ।
