नेपाली काँग्रेसको भातृ संस्था नेपाल मुस्लिम संघ चितवनका अध्यक्ष ईसुफ दिन मियाँले भोलि चैत २७ गते (बिहीबार) ईस्लाम धर्मालम्बीहरुको ‘शबे बरात पर्व’ घरमै बसेर मनाउन अनुरोध गरेका छन् । कोरोना भाइरस (कोभिड–१९) का कारण देश हाल लकडाउनको अवस्थामा रहेकोले घरमै पर्व मनाउन आग्रह गरेका हुन् ।
आज जारी विज्ञप्तीमा यस पर्व मस्जिद तथा कब्रिस्तानहरुमा नगई घरमानै बसेर ईबादत (उपासन) गर्दै मनाउन अनुरोध गरिएको छ । विज्ञप्तीमा देश, विदेशमा बस्ने सम्पूर्ण ईस्लाम धर्मावलम्बीहरुलाई पर्वको शुभकामना दिदै रोग फैलन नदिन आ–आफनो ठाउँबाट सहयोग पु¥याउन आव्हान गरिएको छ ।
यता नेपाली काँग्रेस चितवनका सभापति जीतनारायण श्रेष्ठले मुस्लिम संघका अध्यक्ष मार्फत ईस्लाम धर्मालम्बीहरुलाई घरमानै पर्व मनाउन आव्हान गरिएको बताए । उनले सिंगो नेपाली काँग्रेस रोगको संक्रमण फैलन नदिन केन्द्र देखि गाउँ तहसम्म जुटिरहेको बताए ।
