चीनको वुहानबाट उद्दार गरिएका १ सय ७५ जनामा कोरोनाभाइरस नदेखिएको भन्दै सोमबार घर पठाउने तयारी भइरहेको छ ।
सोमबारनै आएको कोरोना परीक्षणको नतिजामा क्वारेन्टाइनमा राखिएका कसैमा पनि संक्रमण नदेखिएको स्वास्थ्य मन्त्रालयका प्रवक्ता विकास देवकोटाले जानकारी दिएका छन् ।
उनका अनुसार १ सय ७५ जना कसैमा पनि कोरोनाको संक्रमण नदेखिएपछि सबैलाई आजै घर पठाइने भएको छ ।
गत शनिबार कोरोना परीक्षणको लागि उनीहरूको घाँटी र नाकको र्यालको नमूना संकलन गरी राष्ट्रिय जनस्वास्थ्य प्रयोगशालामा पठाइएको थियो ।
गत फागुन ४ गते चीनको वुहानमा रहेका १ सय ७५ जना नेपालीलाई उद्दार गरेर नेपाल ल्याइएको थियो । उद्दार गरेर ल्याइएकाहरुले भक्तपुरको खरिपाटीमा १४ दिनको लागि क्वारेन्टाइनमा राखिएका थिए ।
