भारत– भारतमा आम निर्वाचन अन्तर्गत पहिलो चरणको मतदान सकिएको छ । स्थानीय समयअनुसार बिहान ७ बजेबाट शुरु भएको मतदान बेलुकी ६ बजे सकिएको हो ।
मतदानका क्रममा केही स्थानमा छिटपुट हिंसात्मक घटना भएपनि सामान्यतया मतदान शान्तिपूर्ण नै रहेको भारतीय सञ्चारमाध्यमले जनाएका छन् ।
आन्ध्र प्रदेशको अनन्तपुर जिल्ला अन्तर्गत ताडिपत्री शहरमा क्षेत्रीय दलहरु तेलगूदेशम पार्टी र वाईएसआर काँग्रेस पार्टीका कार्यकर्ताबीच झडप हुँदा २ जनाको ज्यान गएको जनाइएको छ भने आन्ध्र प्रदेशकै अन्य निर्वाचन क्षेत्र तथा मतदान केन्द्रहरुमा सामान्य विवाद र झडप भएको बताइएको छ ।
त्यस्तै, केही निर्वाचन क्षेत्रमा विद्युतीय मतदान मेसिनमा प्राविधिक गडबडी आएकाले मतदानमा सामान्य समस्या आएको र त्यसपछि समाधान गरिएको भारतीय निर्वाचन आयोगले जनाएको छ ।
मतदानका क्रममा मतदाताको उल्लेख्य सहभागिता रहेको बताइएको छ । यद्यपि भारतीय निर्वाचन आयोगले मतदानका क्रममा कति प्रतिशत मतदाताको सहभागिता रह्यो भन्ने बारे तत्काल कुनै जानकारी सार्वजनिक गरेको छैन ।
विहीबार भएको पहिलो चरणको चुनाव अन्तर्गत २० राज्य र केन्द्र शासित प्रदेशका ९१ निर्वाचन क्षेत्रमा मतदान भएको हो ।
दोश्रो चरणको मतदान भने आगामी अप्रिल १८ मा हुनेछ । विभिन्न ७ चरणमा हुने मतदान आगामी मे १९ सम्म चल्नेछ । अन्तिम चरणको मतदान सकिएको ४ दिनपछि अर्थात् मे २३ बाट मतगणना शुरु हुने जनाइएको छ ।
पछिल्ला केही दशकयताको सबैभन्दा महत्वपूर्ण चुनावका रुपमा हेरिएको यसपटकको निर्वाचनमा सत्तारुढ भारतीय जनता पार्टी भाजपा र विपक्षी काँग्रेस पार्टीबीच प्रमुख प्रतिस्पर्धा हुनेछ ।
