कास्की– नेपाली कांग्रेस जिल्ला कोषाध्यक्षहरको भेला पोखरामा शुरु भएको छ । भेलाको विहीबार सभापति शेरबहादुर देउवाले उद्घाटन गरेका हुन् । भेलाको उद्घाटन गर्दै सभापति देउवाले वर्तमान सरकारले नेपाली सेनामाथि हस्तक्षेप गर्न लागेको आरोप लगाएका छन् ।
देउवाले लोकतन्त्रमा सेना स्वतन्त्र रहने उल्लेख गर्दै सेना परिचालन गर्ने अधिकार कसैलाई नभएको जिकिर गरे । उनले विश्वमा प्रधानमन्त्रीले सेना परिचालन गर्ने अधिकार कहीँ नभएका भन्दै सरकार संवैधानिक निकायहरुमाथि हस्तक्षेप गर्न लागिपरेको आरोप लगाए ।
ओली नेतृत्वको सरकार गठन भएको एक वर्ष बिते जनअपेक्षा अनुरुपका केही काम गर्न नसकेको बताउँदै मुलुकमा भ्रष्टाचार, अराजकता मौलाएको आरोप लगाए ।
सभापति देउवाले निर्वाचनमा पार्टीका उम्मेदवार हराउन लाग्ने व्यक्तिहरुलाई कारबाही गर्ने चेतावनी समेत दिए । उनले निर्वाचनमा घात–अन्तर्घात गर्नेहरुलाई कारबाही नगरेसम्म पार्टी सुदृढ नहुने तर्क गरे ।
कार्यक्रममा वरिष्ठ नेता रामचन्द्र पौडेलले संवैधानिक निकायमा नियुक्ति गर्दा राजनीतिक पार्टीहरुबीच पावर सेयरिङ्ग गर्नु समान्य भएको जिकिर गर्दै शक्ति सन्तुलनका आधारमा पावर सेयरिङ्ग हुनुपर्ने स्पष्ट पारे ।
नेता पौडेलले वर्तमान सरकारले समृद्धको नारा लगाए पनि विकासका केही काम नदेखिएको जिकिर गरे । उनले पार्टी एक बनाउन व्यवस्थापनको जिम्मा महामन्त्रीले लिइदिनुपर्ने समेत उल्लेख गरे ।
भेलामा महामन्त्री शशांका कोइरालाले पार्टी एकताका लागि आफू जे सुकै त्याग गर्न तयार रहेको बताए । त्यसैगरी प्रवक्ता विश्वप्रकाश शर्माले कांग्रेसले वैशाख देखि गर्न लागेको जागरण अभियानमा लाग्न सम्पूर्ण नेता कार्यकर्तालाई आग्रह गरेका थिए ।
शुक्रबारसम्म चल्ने भेलामा देशभरका ७७ जिल्लाका कांग्रेस कोषाध्यक्षहरु सहभागी भएका छन् ।
