काठमाडौं– आज मिति २०७५ चैत २६ गते मंगलबार । आज प्रकाशित भएका पत्रपत्रिकाहरुले विभिन्न समाचारहरु छापेका छन् । राजधानी दैनिकले बैंक तथा वित्तीय संस्थाको समाचारलाई मुख्य समाचारका रुपमा आठ महिनामा १ अर्ब बढी ऋण डुब्यो शीर्षकमा समाचार छापेको छ ।
बैंक तथा वित्तीय संस्था ऋण उठाउन नसकेर डुब्ने क्रम बढेको छ । चालू आ.व.को साउनदेखि फागुन मसान्तसम्म विभिन्न बैंक तथा वित्तीय संस्थाको १ अर्ब ५ करोड ८९ लाख ५४ हजार १ सय ९२ रुपैयाँ ऋण डुबेको उल्लेख गरेको छ ।
त्यसैगरी पत्रिकाले चिकित्सकहरुको आन्दोलनले बिरामीमा परेको प्रभावलाई पनि पहिलो पृष्ठमा समाचार छापेको छ । चिकित्सकहरुको आन्दोलनले हजारौं बिरामीको विचल्ली भएको छ । बिरामीहरुले उपचार नपाएपछि सरकारीबाट निजीमा रिफर गरिएको समाचारमा जनाइएको छ ।
त्यसैगरी सरकार र चिकित्सकको अडान झन कसिलो बन्दै गएको छ । सरकार चिकित्सकहरुप्रति आक्रामक बनेको छ भने माग पूरा नभए राजिनामा दिने सम्मको चेतावनी चिकित्सकहरुले दिएका छन् ।
त्यस्तै पत्रिकाले गृहको परिपत्र कार्यान्वयन नगर्न सर्वोच्चको आदेश शीर्षकमा अर्को समाचार छापेको छ । सर्वोच्च अदालतले जन्मका आधारमा नागरिकता लिएकाको सन्तानलाई वंशजको नागरिकता दिन गृह मन्त्रालयले गरेको परिपत्र कार्यान्वयन नगर्न आदेश दिएको हो ।
यसैगरी ‘द्वन्द्वपीडितका नाममा ४९ करोड खर्च, उपलब्धि शून्य’ शीर्षकमा राजधानी दैनिकको पहिलो पृष्ठमा अर्को समाचार छापेको छ । सत्यनिरुपण तथा मेलमिलाप र बेपत्ता पारिएका व्यक्तिको छानविन आयोगको काम निष्प्रभावी भएको छ ।
सत्य र न्यायनिरुपण गर्न बनेका दुई आयोगमा ६३ हजार बढी उजुरी पर्यो तर अलमलमै चार वर्ष बितेको छ । पीडितलाई न्यायको अनुभूति दिलाउनुको साँटो सम्बन्धित पक्षले उनीहरुको पीडामाथि खेलाँची गरेको समाचारमा जनाइएको छ ।
