काठमाडौं– ललिता निवास क्याम्पअन्तर्गतको सरकारी जग्गा व्यक्तिको नाममा गराउँदा सरकारी अधिकारीहरुको मिलिमतोमा भूमाफियाले ११३ रोपनी जग्गा फिर्ता गर्ने क्रममा सो सम्बन्धी सम्पूर्ण मिसिल नै गायब पारेको पाइएको आजको राजधानी दैनिकमा समाचार छ ।
अवैध किसिमले जग्गा फिर्ता गर्ने गरी गरिएका निर्णय मिसिल नं. १०२४ र १०२५ मा समेटिएका थिए तर ती दुवै मिसिल सरकारी अधिकारीहरुको सहयोगमा भूमाफियाले कब्जामा लिएर गायब पारेको समाचारमा उल्लेख छ ।
त्यस्तै पत्रिकाले ढिलो फैसला लेखनले न्याय पाउन ढिलाई शीर्षकमा अर्को समाचार छापेको छ । ८ हजार मुद्दाको फैसला भयो तर जनताले अनुभूत गर्न नपाएको समाचारमा उल्लेख छ ।
सर्वोच्चसहित देशभरकार अदालतमा ८ हजार मुद्दाको फैसला लेख्न बाँकी रहेको देखिएको छ । जिल्ला, उच्च र सर्वोच्च अदालतमा पुगी टुंगिएका मुद्दा लेखन अझै टुंगोमा पुग्न सकेको छैन ।
फास्ट ट्र्याकबाट न्याय निदुपर्ने माग उठिरहेको अवस्थामा गरिएको फैसला लेख्नै ढिलाई हुँदा न्यायको आशामा बसेका पीडितहरुले न्याय पाएको अनुभूति गर्न नसकेको समाचारमा उल्लेख छ ।
त्यस्तै पत्रिकाले आगामी बजेट १५ अर्बको ल्याउने तयारी भएको उल्लेख गरेको छ । अर्थ मन्त्रालयले आव २०७६/०७७ को बजेट तयारीको काम तीव्र रुपमा अगाडि बढाएको छ । संवैधिानिक व्यवस्थाअनुसार सरकारले आगामी १५ जेठमा बजेट सार्वजनिक गरिसक्नुपर्ने हुन्छ ।
त्यस्तै पत्रिकाले कांग्रेसभित्रको किचलोलाई पनि पहिलो पृष्ठमा ‘पौडेल–सिटौला’ दूरी बढ्दै शीर्षकमा समाचार छापेको छ । पछिल्लो समय नेपाली कांग्रेसको कार्यसम्पादन समिति गठनमा देखिएको विादसँगै पार्टीभित्रै प्रतिपक्षका रुपमा रहेका पूर्वमहामन्त्री कृष्णप्रसाद सिटौला र वरिष्ठ नेता रामचन्द्र पौडेलबीचको दूरी एकाएक बढेको समाचारमा उल्लेख छ ।
