अल्जेरिया– राष्ट्रपति अब्देलाजिज बोटेफ्लिकाले राजीनामा दिएपछि अल्जेरियाको संसद्मा नयाँ अन्तरिम राष्ट्रपति चयनका लागि मंगलबार मतदान हुने भएको छ ।
अल्जेरियाको संविधानअनुसार नयाँ अन्तरिम राष्ट्रपति चयन गर्न दुबै सदनबाट राष्ट्रपतिको पद खाली रहेको निश्चित गरी माथिल्लो सदनका अध्यक्षलाई स्वीकृत हुनुपर्ने प्रावधान छ ।
यसअनुसार माथिल्लो सदनका अध्यक्ष अब्देलकादेर बेनसलाह अन्तरिम राष्ट्रपतिका उम्मेद्वार छन् । अन्तरिम राष्ट्रपतिले नयाँ राष्ट्रपति चयनका लागि चुनाव हुनेबेलासम्म बढीमा ३ महिना पदमा रहन पाउने व्यवस्था छ ।
यद्यपि उनी तथा वर्तमान प्रधानमन्त्री नूरद्दिन बदोय र मुलुकको संवैधानिक परिषद्का अध्यक्ष तयब बेलाइजलाई राष्ट्रपति बोटेफ्लिाको नजिक रहँदै आएकाले उनीहरुमाथि पनि पदबाट राजीनामा दिनुपर्ने दबाब रहेको बताइन्छ ।
सन् १९९९ यता राष्ट्रपतिको पदमा रहेका बोटेफ्लिकाले यसै महिना हुने भनिएको राष्ट्रपीय निर्वाचनमा पनि पाचौँ कार्यकालका लागि उम्मेद्वारी दिएपछि उनीविरुद्ध प्रदर्शन हुँदै आएको थियो । प्रदर्शनकारीको दबाबपछि उनले एक साताअघि राजीनामा दिएका थिए ।
यद्यपि प्रदर्शनकारीहरुको माग बोटेफ्लिकामात्र नभई बोटेफ्लिका नजिक रहँदै आएका सबै राजनीतिज्ञले राजनीति छाड्नुपर्ने रहेकाले नयाँ अन्तरिम राष्ट्रपति बेनसलाह पनि दबाबमा रहनसक्ने बताइएको छ ।
