काठमाडौं– नेपाली लेग स्पिनर सन्दीप लामिछाने सामेल टोली दिल्ली क्यापिटल्सले इन्डियन प्रिमियर लिग (आईपीएल) मा तेस्रो जीत हात पारेको छ ।
दिल्लीले आइतबार बैंगलोरको घरेलु मैदानमा उसलाई ४ विकेटले पराजित गर्दै लिगमा पुनरागमन गरेको हो । पछिल्लो खेलहरुमा कमजोर ब्याटिङले हार व्यहोर्दै आएको दिल्लीका लागि कप्तान श्रयस अयरले कप्तानी पारी खेल्दै टोलीलाई जीत दिलाए ।
बैंगलोरले दिएको १ सय ५० रनको लक्ष्य पछ्याएको दिल्लीले १८.५ ओभरमा ६ विकेट गुमाएर १ सय ५२ रन बनाउँदै टिमलाई जित हात पार्यो ।
दिल्लीका लागि कप्तान अयरले ६७ रन बनाए । उनले ५० बलमा ८ चौका र २ छक्काको मद्दतमा ६७ रन बनाएका हुन् । यस्तै, दिल्लीका लागि पृथ्वी श्वाले २८ रन, कोलिन इग्रामले २२ रन बनाए भने रिसभ पन्तले १८ रन बनाए ।
दिल्लीविरुद्ध बैंगलोरका बलर नभदीप साइनीले २ विकेट लिए भने पवन नेगि, मोहमम्द सिरज, टिम साउथी, मोईन अलिले समान एक—एक विकेट लिए ।
यसअघि पहिलो ब्याटिङ गरेको बैंगलोरले दिल्लीलाई १ सय ५० रनको लक्ष्य दिएको थियो । टस हारेर पहिलो ब्याटिङको निम्तो पाएको बैंङ्लोरले निर्धारित २० ओभर पुरा खेलेको बैंङ्लोरले ८ विकेट गुमाएर १सय ४९ रन बनाएको थियो ।
दिल्लीका बलर कागिसो रबाडाले उत्कृष्ट बलिङ गरेपनि बैंङ्लोरले १ सय ४९ रन बनाएको थियो । बैंङ्लोरका लागि कप्तान विराट कोहलीले ४१ रन र मोईन अलिले ३२ रन बनाएका थिए ।
अन्य ब्याट्सम्यानहरुमा अक्षदीप नाथले १९, एबि डि भिलियर्सले १७ र मार्कस स्टोनिसले १५ रन बनाएका थिए । बैंङ्लोरविरुद्ध कागिसो रबाडाले ४ विकेट लिए । उनले ४ ओभर बलिङ गर्दै २१ रन खर्चेर एक विकेट लिए । यस्तै, क्रिस मोरिसले २ तथा अक्षर पटेलले एक विकेट लिएका थिए ।
त्यस्तै, नेपाली लेग स्पिनर सन्दीप लामिछाने बैंङ्लोरविरुद्ध महंगा सावित भएका छन् । उनले खेलमा ४ ओभर बलिङ गर्दै ४६ रन खर्चेर १ विकेट लिए भने दिल्लीलाई पहिलो विकेटको सफलता दिलाउन पार्थिव पटेलको क्याच लिएका थिए । जीतसँगै दिल्ली ६ अंकसहित ५ औं स्थानमा उक्लिएको छ भने बैंगलोर पुछारमा रहेको छ ।
