नेपाली कांग्रेसका नेता डा प्रकाशशरण महतले पार्टी सभापति गगन थापाप्रति असन्तुष्टि जनाउँदै अरूमाथि आरोप लाग्दा पद छाड्नुपर्ने बताउनेले आफूमाथि आरोप लाग्दा के गर्छन् भन्दै प्रश्न गरेका छन्।
काठमाडौँमा आयोजित एक कार्यक्रममा बोल्दै महतले विगतमा पार्टीका नेताहरूमाथि आरोप लाग्दा उनीहरूलाई पदबाट हटाउनुपर्ने आवाज उठाउनेहरू अहिले आफूमाथि आरोप लाग्दा भने फरक व्यवहार देखाइरहेको टिप्पणी गरे।
‘अरूलाई पर्दाखेरि त यिनीहरू सबै खत्तम हुन्, हामी मात्रै पवित्र र ठीक छौँ, अरूलाई सरकारले हटाउनुपर्छ भन्ने साथीहरू आज आफूमाथि त्यस्तै आरोप लागेपछि कसरी हाम्रो विरुद्ध यस्तो भयो भन्दै हुनुहुन्छ,’ उनले भने।
पार्टीको आधिकारिकतासम्बन्धी विवादमा सभापति थापामाथि बिचौलियासँग १८ करोड रुपैयाँको चलखेल गरेको आरोप लागेको प्रसंगमा महतले यस्तो टिप्पणी गरेका हुन्।
उनले कांग्रेसलाई व्यक्तिवादी नभई सिद्धान्तनिष्ठ, विधिसम्मत र संस्थागत संस्कारअनुसार सञ्चालन गर्नुपर्नेमा जोड दिए। विशेष महाधिवेशन पक्षधरहरूले पार्टीमा विचार, विधान र राजनीतिक संस्कारलाई प्राथमिकता नदिएको उनको आरोप थियो।
महतले कांग्रेसमा विगतदेखि नै प्रतिस्पर्धा, बहस र फरक मतलाई स्वीकार गर्दै सबैको भावना र दृष्टिकोण समेटेर निष्कर्षमा पुग्ने परम्परा रहेको स्मरण गरे। तर पछिल्लो समय पार्टीमा संस्कार, विचार र विधानको पालना कमजोर हुँदै गएको उनको भनाइ थियो।
‘न संस्कार छ, न विचार छ, न विधान छ। यस्तो कुरालाई हामीले स्वीकार गर्ने हो भने अनि हामी कांग्रेस हुन्छौँ?’ उनले प्रश्न गरे। उनले कांग्रेसको रूख चुनाव चिह्न मात्र नभई प्रजातान्त्रिक समाजवाद र पार्टीको राजनीतिक विचारधाराको प्रतीक भएको बताए।
पार्टीको आधिकारिकतासम्बन्धी विवाद अदालतमा विचाराधीन रहेकाले त्यसको निर्णय आउन बाँकी रहेको अवस्थामा चुनाव चिह्न र आधिकारिकताबारे अन्योल सिर्जना गरिएको उनले बताए। आधिकारिकता कसले पाउने भन्ने अनिश्चितताले पार्टीभित्र डर र त्रासको वातावरण बनेको उनको भनाइ थियो।
