श्रम संस्कृति पार्टीका प्रमुख सचेतक आर्यन राईले मनाङको हिम लुङ हिमालमा गएको हिमपहिरोमा बेपत्ता भएकाहरूको खोजी, त्रिपुरेश्वरमा भएको आत्मदाह घटनाका पीडित परिवारसँगको संवादहीनता र पोल्याण्डमा कार्यरत नेपाली श्रमिकले बैंक खाता खोल्न नपाएको समस्याबारे सदनमा सरकारको ध्यानाकर्षण गराउनुभएको छ ।
प्रतिनिधि सभाको बुधवारको बैठकमा उहाँले सरकारको ध्यानाकर्षण गराउनुभएको हो । सांसद राईले गत असोज ११ गते मनाङको हिम लुङ हिमालमा गएको हिमपहिरोमा परी खोटाङको ऐसेलुखर्क गाउँपालिकाका तीनजना श्रमिक बेपत्ता भएको स्मरण गराउनु भयो । उहाँले हालसम्म एकजना घनश्याम राईको शव फेला परे पनि लककुमार गुरुङ र सुरज राईको अवस्था अझै अज्ञात रहेको र आफन्तले सरकारबाट खोजी कार्यमा पर्याप्त तत्परता नदेखाएको गुनासो गरिरहेको सदनलाई जानकारी गराउनु भयो ।
