सिरहाको गोलबजारमा साउन १४ मा भएको हिंसात्मक घटनापछि धेरै व्यावसायिक पसल अझै खुलेका छैनन् । नखुलेका ती पसल मुस्लिम समुदायका व्यवसायीका हुन् ।
सरकारले क्षतिपूर्ति र सुरक्षित रूपमा व्यवसाय सञ्चालन गर्ने वातावरणको प्रत्याभूति नदिलाएसम्म पसल नखोल्ने अडान उनीहरुको छ ।
घटना भएको करिब एक साता बितिसक्दा पनि सरकार, स्थानीय तह, व्यापार संघ वा सम्बन्धित निकायबाट आफ्नो अवस्था बुझ्न कोही नआएको गुनासो उनीहरुको छ ।
गोलबजारमा मुस्लिम समुदायका व्यवसायीले सञ्चालन गरेका कपडा पसल, मोटरसाइकल वर्कसप, मोटर पार्टस् पसल, फार्मेसी, सुन पसललगायत बन्द छन् । आन्दोलनको क्रममा सिरहामा व्यावसायिक मल तथा पसलमा चोरी, तोडफोड र आगजनी पनि भएको थियो ।
गृहमन्त्री सुदन गुरुङ मृतक गणेश यादवको परिवारलाई भेट्न गत हप्ता शुक्रबार सिरहा पुगेका थिए । परिवारसँग सहमति भएपछि उनी काठमाडौं फर्किएका थिए । अहिले तराई–मधेश तनावमुक्त अवस्थामा छ । तर प्रभावित व्यवसायीहरू भने आफूहरूको क्षतिको उचित मूल्याङ्कन, क्षतिपूर्ति र सुरक्षित रूपमा व्यवसाय सञ्चालन गर्न सकिने वातावरणको सुनिश्चितता नभएसम्म पसल नखोल्ने अडानमा बसेका छन् ।
