बागमती प्रदेशको आन्तरिक मामिला तथा कानुन मन्त्रालयको सहयोगमा सशस्त्र प्रहरी बल नेपाल नं ३ गढीमाई बाहिनी मकवानपुरअन्तर्गत नं १७ गण हेडक्र्वाटर चितवनले सञ्चालन गरेको १० दिने गोताखोर पुनर्ताजगी तालिम सम्पन्न भएको छ । तालिम समापनका अवसरमा चितवनको ठिमुरा तथा तनहुँको देवघाटस्थित त्रिशूली नदीकिनार र नदीमा विपद् पूर्वअभ्यास तथा उद्धार प्रदर्शन गरिएको हो ।
समापन समारोहमा आन्तरिक मामिला तथा कानुनमन्त्री शिवराज अधिकारीले यस्ता तालिमले विपद्का समयमा नागरिकलाई छिटो र प्रभावकारी सेवा दिन तथा राहत पुर्याउन सहयोग पुग्ने विश्वास व्यक्त गर्नुभयो । उहाँले तीनै तहका सरकारले तालिम र उद्धार सामग्री व्यवस्थापनमा आवश्यक सहयोग गर्नुपर्नेमा जोड दिनुभयो ।
विपद्का घटना हुनासाथ सबैभन्दा पहिले सशस्त्र प्रहरी परिचालन हुने उल्लेख गर्दै मन्त्री अधिकारीले उद्धारकर्मीले आफ्नो ज्यान जोखिममा राखेर काम गर्ने भएकाले गुणस्तरीय उपकरण र सामग्रीको व्यवस्था अनिवार्य हुनुपर्ने बताउनुभयो ।
भरतपुर महानगरपालिकाका कार्यवाहक प्रमुख चित्रसेन अधिकारीले गोताखोरका लागि उच्चस्तरीय उपकरणसहित ‘लाइफ ज्याकेट’ उपलब्ध गराउने प्रतिबद्धता व्यक्त गर्नुभयो । उहाँले आवश्यक सामग्री यथाशीघ्र वितरण गरिने र गोताखोरलाई सुरक्षित तथा प्रोत्साहित बनाउन स्थानीय तहले सहयोग गर्ने प्रतिबद्धता जनाउनुभयो ।
चितवनका प्रमुख जिल्ला अधिकारी गणेश अर्यालले नदीजन्य विपद्मा गोताखोर उद्धारकर्मीको भूमिका अत्यन्त महत्त्वपूर्ण हुने बताउनुभयो । नेपालमा दक्ष गोताखोरको अभाव हुँदा विगतमा विदेशबाट गोताखोर झिकाउनुपर्ने अवस्था रहेको स्मरण गर्दै उहाँले अहिले सशस्त्र प्रहरीले त्यो आवश्यकता अन्त्य गरेको उल्लेख गर्नुभयो ।
सशस्त्र प्रहरी बल नेपाल नं ३ गढीमाई बाहिनीका बाहिनीपति किरण बस्नेतले बागमती प्रदेश विपद्को उच्च जोखिममा रहेको उल्लेख गर्दै जुरे पहिरो, मेलम्ची बाढी, सिमलताल दुर्घटना, झ्याप्ले खोलाको दुर्घटना तथा रोशीखोला बाढीजस्ता घटनाको स्मरण गर्नुभयो । उहाँका अनुसार नेपालमा हाल सशस्त्र प्रहरीका १३४ जना दक्ष गोताखोर कार्यरत छन् ।
बागमती प्रदेशमा एक विपद् व्यवस्थापन तालिम शिक्षालय, चार डेडिकेटेड विपद् व्यवस्थापन बेस र १० वटा अस्थायी मनसुन प्रतिकार्य टोली सञ्चालनमा रहेका बाहिनीपति बस्नेतले जानकारी दिनुभयो । उहाँका अनुसार चितवन र सिन्धुलीमा २२ जना गोताखोरसहितको उद्धार टोली २४सै घण्टा तयारी अवस्थामा छन् ।
चालु आर्थिक वर्षमा बागमती प्रदेशमा भएका ४३५ विपद्जन्य घटनामा सशस्त्र प्रहरी परिचालन भई ५१९ जनाको सकुशल उद्धार, एक हजार ९०८ घाइतेको उद्धार तथा ३०५ जनाको शव व्यवस्थापन गरी कुल दुई हजार ७३२ जनालाई उद्धार सेवा प्रदान गरेको बाहिनीपति बस्नेतले जानकारी दिनुभयो । तीमध्ये ३१ घटनामा दक्ष गोताखोर परिचालन गरिएको थियो ।
सशस्त्र प्रहरी बल नेपाल नं १७ गण हेडक्र्वाटर चितवनका प्रमुख प्रहरी उपरीक्षक धनबहादुर बानियाँले तालिम पौडीपोखरी तथा नारायणी र त्रिशूली नदीमा सञ्चालन गरिएको जानकारी दिनुभयो । उहाँले तालिमबाट गोताखोरको क्षमता अभिवृद्धि भएको विश्वास व्यक्त गर्दै सशस्त्र प्रहरीले पहिलोपटक पुनर्ताजगी तालिम सञ्चालन गरेको बताउनुभयो ।
जीवनरक्षा नै सशस्त्र प्रहरीको मुख्य उद्देश्य भएकाले यस्ता तालिमले उद्धारकार्यलाई थप प्रभावकारी बनाउने प्रमुख प्रहरी उपरीक्षक बानियाँको भनाइ छ । यसअघि सिन्धुलीको खुर्कोटमा १० जनालाई यस्तै तालिम प्रदान गरिएको थियो भने अहिले चितवनमा १० जना सहभागीलाई पुनर्ताजगी तालिम दिइएको हो ।
रासस
