कलाकार दुर्गेश थापाले विभिन्न मिडियामा जापान सरकारले आफुलाई भिसा नदिएको समाचार प्रति आपत्ति जनाएका छन् । आज (बिहीबार) सामाजिक सञ्जाल फेसबुक मार्फत थापाले जापानमा हुन लागेको ‘नेपाल महोत्सव २०२५’मा केही मिडियाले भ्रमपूर्ण समाचार सार्वजनिक गरेको भन्दै खण्डन गरेका हुन् ।
गल्कोट समाज जापानले निमन्त्रणा गरेपनि कुवेतमा हुने कार्यक्रम पहिले नै तय भएकाले जापानका लागि पेश गरिएको राहादानी आफुले नै झिकेको बताएका छन् ।
‘गल्कोट समाज जापानले तपाईँलाई कार्यक्रममा लैजानु हाम्रो जिम्मेवारी हो भनेर आग्रह गरेपछि, म पनि उत्साहित थिएँ र हुन्छ भनेर सकारात्मक प्रतिक्रिया पनि दिएको थिएँ। ७ जुन २०२५ मा कुवेत मा हुने कार्यक्रमको लागि म पहिल्यै सम्झौता गरिसकेको थिएँ र त्यो मेरो प्राथमिकता बनिसकेको थियो । तर कुवेतको कार्यक्रम नजिकिँदै गर्दा पासपोर्ट बिना विदेश जान नसकिने हुँदा मैले आफ्नो पासपोर्ट ३ दिनमै फिर्ता लिनु पर्यो र सम्झौताअनुसार कुवेत गएँ’, उनले सामाजिक सञ्जालमा फेसबुकमा लेखेका छन् ।
उनले नेपाल महोत्सव जापानसँग कुनै औपचारिक सम्झौता समेत नगरेको बताएका छन् । आफूले कार्यक्रम रद्द गरेको नभई आयोजकले तिन दिनमा भिषा लगाउछु भनेता पनि सो भन्दा धेरै दिन लाग्ने आयोजक लाई पहिलेनै जानकारी गराएको बताएका छन् । उनले भ्रामक समाचार र अफवाहमा नपर्न समेत दर्शक स्रोतालाई अनुरोध गरेका छन् । उनले आगामी दिनमा जापान जाने विश्वास समेत दिलाएका छन् ।
