सर्वोच्च अदालतले पूर्व सभामुख एवं नेकपा (माओवादी केन्द्र)का उपाध्यक्ष अग्निप्रसाद सापकोटाविरुद्धको उजुरीमा अनुसन्धान गर्न आदेश दिएको छ । पूर्णिमाया लामाले दायर गरेको रिटमा बुधबार फैसला सुनाउँदै सर्वोच्च अदालतको संवैधानिक इजलासले उत्प्रेषणको आदेश जारी गरेको हो ।
यससँगै प्रहरीले सापकोटामाथि ज्यान मुद्दामा अनुसन्धान अगाडि बढाउनुपर्ने भएको छ । सशस्त्र द्वन्द्वकालमा काभ्रेका अर्जुन लामाको हत्या भएको सम्बन्धमा दिएको उजुरीमाथि प्रहरीबाट अनुसन्धान नभएपछि पूर्णिमाया लामाले सर्वोच्चमा रिट दायर गरेकी थिइन् । तर, सापकोटाविरुद्ध नै कनकमणि दीक्षित दायर गरेको रिटमा भने मागदाबी नपुग्ने फैसला भएको छ ।
दीक्षितले सर्वोच्चमा रिट विचाराधीन रहेका बेला सञ्चारमन्त्री बनेको भन्दै अदालतको अवहेलनासम्बन्धी रिट हालेका थिए । यसैगरी, सुशील प्याकुरेललगायतले दायर गरेको रिट खारेज भएको छ ।
सर्वोच्चमा लामो समयदेखि विचाराधीन रिटमाथि सुनुवाइपछि प्रधानन्यायाधीश प्रकाशमानसिंह राउत तथा न्यायाधीशहरू सपना प्रधान मल्ल, कुमार रेग्मी, डा. मनोजकुमार शर्मा र डा. कुमार चुडाल सम्मिलित संवैधानिक इजलासले फैसला सुनाएको हो ।
