पूर्व पश्चिम राजमार्ग अन्तरगत मकवानपुरको मनहरी गाउँपालिका–६, भुलचोकमा बसले स्कुटरलाई ठक्कर दिँदा चितवनका एक युवकको मृत्यु भएको छ ।
हिजो अपरान्ह ५ः३० बजेको समयमा चितवनबाट हेटौंडातर्फ जाँदै गरेको बा ४ ख ५५८२ नम्बरको बसले मनहरीबाट चितवनतर्फ आउँदै गरेको बा.प्र.०६–००२प ४२३३ नम्बरको स्कुटरलाई ठक्कर दिँदा भरतपुर महानगरपालिका–२ क्षेत्रपुर बस्ने बर्ष २८ का आकास बरामुको मृत्यु भएको मकवानपुर प्रहरीले जानकारी दिएको छ । टाउकोमा चोट लागेर गम्भिर घाइते भएका बरामुको उपचारको क्रममा चितवन मेडिकल कलेजमा राति ११ः४४ बजेको समयमा मृत्यु भएको प्रहरीले जनाएको छ ।
दुर्घटनामा स्कुटरमा सवार सुनसरीको ईटहरी उपमहानगरपालिका–७ बस्ने वर्ष २८ का बुद्ध लामा गम्भिर घाइते छन् । उनको चितवन मेडिकल कलेजमै उपचार जारी छ ।
दुर्घटना पछि फरार भएका बसका चालक उदयपुर चौरण्डी गढी नगरपालिका–७ बस्ने बर्ष ३१ को नबिन थापालाई मकवानपुर प्रहरीले पक्राउ गरेको छ । बस चालक थापालाई आज विहान १०ः४५ बजेको समयमा मनहरी बजारबाट नियन्त्रणमा लिएको इलाका प्रहरी कार्यालय मनहरीले जनाएको छ । घटना बारे थप अनुसन्धान भइरहेको प्रहरीले जनाएको छ ।
