मकवानपुरको कैलाश गाउँपालिका ५ कालीखोलामा आफ्नै श्रीमतीको हत्या गरेको आरोपमा प्रहरीले एक जनालाई नियन्त्रणमा लिएको छ। २० वर्षीया श्रीमती लक्ष्मी पाख्रीनको हत्या गरेको आरोपमा कैलाश गाउँपालिका ५, काफलडाँडाका २६ वर्षीय मंगलबहादुर पाख्रीन पक्राउ परेका हुन्।
मकवानपुर प्रहरीका अनुसार मंगलबहादुरले साउन २७ गते आफ्नै घरमा श्रीमतीलाई धारिलो हतियार बन्चरो प्रहार गरी हत्या गरेका थिए। प्रहरीका अनुसार उनले श्रीमतीको शवलाई ११ टुक्रा पारी दुई बोरामा राखी कालीखोला स्थित सामुदायिक वनमा लगेर गाडेका थिए। श्रीमतीको कपडाहरु शव गाडेको स्थानबाट केही पर खाल्डो खनेर गाडेको अवस्थामा फेला परेको मकवानपुर प्रहरी प्रमुख (प्रहरी उपरीक्षक) सीताराम रिजालले जानकारी दिए। प्रहरीले मंगलबहादुरलाई जिल्ला अदालत मकवानपुरबाट १० दिनको म्याद अनुमति लिएर आवश्यक अनुसन्धान प्रक्रिया अघि बढाएको छ।
