चितवनको नारायणी नदी किनारमा आजदेखि चितवन नारायणी महोत्सव सुरु भएको छ । रिकभरिङ युनाईटेड प्रालि र औद्योगिक शान्ति नेपालको संयुक्त आयोजनामा सुरु भएको महोत्सवको आज एक कार्यक्रमका बिच जिल्ला समन्य समिति चितवनका प्रमुख नारायणप्रसाद अधिकारीले उद्घाटन गर्नुभयो ।
महोत्सव मंसिर १६ गतेसम्म सञ्चालन हुनेछ । लागूऔषध तथा मद्यपान प्रयोगकर्ताहरुको निःशुल्क उपचार गर्ने उद्देश्य लिएर महोत्सव आयोजना गरिएको रिकभरिङ युनाईटेड प्रालिका अध्यक्ष रविन श्रेष्ठले बताउनुभयो । उहाँका अनुसार महोत्सव अवलोकनका लागि विद्यार्थीलाई ५० रुपैयाँ र अन्यलाई ७० रुपैयाँको टिकटको व्यवस्था गरिएको छ ।
महोत्सव सम्पन्न गर्न ५७ लाख रूपैयाँ खर्च हुने अनुमान छ । रिकभरिङ युनाइटेडले हालसम्म एक हजार पाँच सय जना लागूऔषध प्रयोगकर्ताहरुको निःशुल्क उपचार गरिसकेको छ ।
महोत्सवमा अटोमोबाइल, कृषि तथा हस्तकला, खाना, फेन्सी लगायतको स्टल रहने छन् भने निःशुल्क स्वास्थ्य शिविर, नृत्य प्रतियोगिता, लागुऔषध दुव्र्यसनी विरुद्ध सचेतनामुलक कार्यक्रम र अन्तर्राष्ट्रिय स्तरका बाल उद्यान रहने उहाँले जानकारी दिनुभयो ।
महोत्सवमा २५० भन्दा बढी स्टलहरु रहेको उहाँले बताउनुभयो । महोत्सवमा दैनिक ५ जना भन्दा बढी राष्ट्रिय तथा स्थानीय कलाकारको प्रस्तुती रहने उहाँले जानकारी दिनुभयो । भोलि महोत्सवमा राष्ट्रिय स्वतन्त्र पार्टी नेता रमेश प्रसाई आउने कार्यक्रम रहेको संस्थापक अध्यक्ष मनोज घिमिरेले जानकारी दिनुभयो । जिल्ला समन्वय समिति चितवनका प्रमुख नारायणप्रसाद अधिकारी प्रमुख अतिथि रहनुभएको कार्यक्रममा नेकपा एमाले चितवनका उपसचिव प्रकाश ढुंगाना, नेकपा (माओवादी केन्द्र) चितवनका अध्यक्ष रामचन्द्र अधिकारी, राष्ट्रिय स्वतन्त्र पार्टीका जिल्ला सभापति कृष्ण प्रसाद भूषाल लगायतको उपस्थिती रहेको थियो ।
