काठमाडौँमा आजबाट सुरु भएको त्रिकोणात्मक टि२० आई सिरिज अन्तर्गत युएईसँगको खेलमा नेपालले १४१ रनको लक्ष्य पाएको छ ।
माथिल्लो मुलपानी क्रिकेट मैदानमा टस हारेर पहिले व्याटिङ गरेको युएई निर्धारित ओभरमा ७ विकेट गुमाउँदै १४० रन जोड्न सक्यो । उसका लागि बासिल हामिदले सर्वाधिक ५१ रनको अर्धशतकीय पारी खेले । अलि नासिरले ३२ रन बनाए भने कप्तान मुहम्मद वासिले १७ र आसिफ खान १५ रन बनाए ।
युएईलाई कम रनमा रोक्न करन केसीले ३ विकेट लिए । केसीले ४ ओभरमा १९ रन मात्रै खर्चिए । गुल्शन झाले ३ ओभरमा ११ रन खर्चिदै महत्वपूर्ण २ विकेट लिए भने सोमपाल कामी र अविनाश बोहोराले समान एक विकेट लिए । अन्य बलर भन्दा बोहोरा केही महंगो सावित हुँदै ४ ओभरमा ३८ रन खर्चिए ।
नेपालका कप्तान रोहित पौडेलले जितेर पहिला फिल्डिङ गर्ने निर्णय लिएका थिए ।
नेपाल युएईलाई हराउँदै त्रिकोणात्मक सिरिजमा सानदार सुरुवात गर्न चाहन्छ । योसँगै मुलपानी मैदान टि२० आई मान्यता पाउने विश्वको १ सय ९० औं क्रिकेट मैदान बनेको छ ।
पछिल्लो समय नेपालले टि२० आईमा युएईसँग गतवर्ष फेब्रुअरीमा आइसिसी टि२० विश्वकप एसिया क्षेत्र छनोटको सेमिफाइनलमा खेलेको थियो । त्यहिँ खेलमा हारको कारण नेपालले विश्वकप खेल्न सकेको थिएन । पछिल्ला पाँच टि२० आई खेलमा युएई तीन खेलमा विजयी भएको छ । नेपाल र युएईबीच पाँच टि२० आई खेल भएको छ । जसमा नेपाल २ खेलमा विजयी हँदा तीन खेलमा पराजित भएको छ ।
