पुर्वी चितवनको कालिका नगरपालिका–६ खोलेसिमल स्थित मनकामना दुग्ध उत्पादक सहकारी सस्थाबाट भारतको सिक्किम भ्रमण गएका मध्ये २ जनाको हिमपहिरोमा परेर मृत्यु भएको छ । नेपाली समय अनुसार हिजो दिउसो मंगलबार करिब १२ बजे सिक्किमको छिन्चु लेकमा पहिरोमा परि मृत्यु भएको सिक्किम प्रहरीले पुष्टी गरेको छ ।
कालिका नगरपालिकाका मेयर विनोद रेग्मीले भ्रमण गएका दुई जनाको मृत्यु भएको र तीन जना घाइते भएको जानकारी दिए । हिँउमा फसेका नागरिकको उद्धार, मृतकको शव व्यवस्थापन र घाइतेको उपचारको लागि इलामका सिडिओ श्रवणकुमार पोखरेलसँग सहयोग मागेको उनले बताए । भ्रमण गएकाहरुसँग मेसेन्जरमार्फत कुरा भइरहेको उनले बताए ।
मृत्यु हुनेमा सोही सहकारीका सदस्य शिवप्रसाद लामिछाने र आशिका ढकाल रहेका छ् । उनीहरु दुबै कालिका–६ खोलेसिमलका हुन् । लामिछाने सो संस्थाका कार्य समिति सदस्य समेत थिए । सो हिमपहिरोमा परि सो सस्थाका करिब १ दर्जन सदस्य घाइते भएका छन् भने ३ जनाको गम्भीर अबस्थामा उपचार भई रहेको प्रहरीले बताएको छ ।
सिक्किम स्थित अस्पतालमा उपचाररत हुनेहरूमा सो सहकारीका रमेश खनाल, ज्योति गुरुङ र गीता सापकोटा रहेका छन । पहिरोले सहकारीका २ जना सहित ७ जनाको मृत्यु भएको र घाइते १३ जना मध्ये ६ जना अस्पताल मै उपचाररत रहेको डिस्टिक्ट कलेक्टर, सिक्किमले बिज्ञप्तीमा जनाएको छ । सो सहकारीबाट २ वटा बसमा करिब ७० जना भ्रमण गएको बताईएको छ ।
