पछिल्लो केही समययता विदेशी नागरिकले पनि नेपाली गीतमा टिकटक बनाउन थालेका छन् । गीतको आकर्षक शब्द, लय तथा त्यसका छोटा भिडियोमा विदेशीले टिकटक बनाउन थालेका हुन् । टिकटक बनाइएका भिडियोमा पनि विदेशीले टिकटक बनाउने गरेका छन् ।
यसै महिना गायिका एलिना चौहानको कन्सर्टमा गाइएको गीत ‘मिनरल वाटर’को दृश्य टिकटकमा भाइरल बनेको थियो । एसिया, युरोप, अफ्रिका र ल्याटिन अमेरिकी मुलुकका टिकटक प्रयोगकर्ताले उक्त गीतमा भिडियो बनाउँदै सेयर गरिरहेका छन् ।
यतिबेला हामी दक्षिण कोरियाली टिकटक स्टार केजिमिनको कुरा गर्दैछौं, जो पछिल्लो समयमा नेपालमा समेत हिट छिन् । झण्डै दुई दर्जन नेपाली हिट गीतमा उनले टिकटक बनाएकी छन् । विश्वचर्चित कोरियाली ब्याण्ड बीटीएसको गीतदेखि नेपालीसम्म जसरी उनले भिडियो बनाएकी छन्, यसले पक्कै नेपाली संगीतलाई फाइदा पुगेको छ ।
केजिमिनलाई टिकटकमा एक करोड जनाले पछ्याएका छन् । टिकटकमा उनको लाइक २६ करोड ४१ लाख पटक उनको भिडियोमा लाइक गरिएको छ । हरियो कपालमा आकर्षक देखिएकी केजिमिनको उमेर २० वर्ष आसपासमा छ । उनको भिडियोलाई नेपाली टिकटक प्रयोगकर्ताले पनि रुचाएको देखिन्छ । उनलाई पछ्याउने नेपाली टिकटकरको संख्या पनि उच्च छ ।
केजिमिनले शुक्रबारदेखि रिलिज हुन लागेको फिल्म ‘छक्कापञ्जा ४’को गीत दर्शन सलामदेखि चरी कहाँ छ, नलाऊ माया, लैलै बरै, च्याङ्वा होई च्याङ्वा, जुन मलाई भन्छौ भने, जुनी काट्छु भन्थ्यौ नि मसित, करिमले छेउ लाएपछि त, पियार पियार, समाउ हातैमा, ए फूलमायासहित झण्डै दुई दर्जन गीतमा भिडियो बनाएकी छन् ।
शब्द नबुझिएपनि पछिल्लो समय संगीत र त्यसको लयशैलीले नेपाली गीतमा विदेशीले टिकटक बनाइरहेका छन् ।
