वरिष्ठ आँखा रोग विशेषज्ञ डा सन्दुक रुइत ‘इसा अवार्ड’बाट सम्मानित भएका छन्। बहराइनमा मंगलबार आयोजित कार्यक्रममा बहराइनका राजा सेख हमद विन इसा अल खालिफाले उनलाई अवार्ड प्रदान गरेको प्रतिष्ठानका जनसम्पर्क अधिकृत सुनिता केसीले जानकारी दिइन्।
बहराइनका राजा अल खालिफाले डा रुइतलाई १० लाख डलरबराबरको अवार्डसहित सम्मानपत्र प्रदान गरेका छन्। ‘इसा अवार्ड फर सर्भिस टु ह्युमानिटी’ संस्थाले तिलगंगा आँखा प्रतिष्ठानका कार्यकारी निर्देशकसमेत रहेका रुइतलाई आँखा उपचार गरेर अन्धोपन हटाउन खेलेको भूमिकाको योगदान गर्दै अवार्ड प्रदान गरेको हो।
पुरस्कार ग्रहण गरेपछि डा रुइतले आफुले पुरस्कार प्राप्त गर्नु नेपालीको लागि नै गर्वको क्षण भएको बताए । यसले नेपाल र नेपालीको इज्जत र सम्मान बढाएको उनले बताए ।
‘मैले भर्खरै बहराइनको राजाको हातबाट यो ठूलो पुरस्कार ग्रहण गरेको छु । यो पुरस्कार मेरो लागि मात्र नभएर समग्र देशवासी तथा नेपालीहरुको लागि गर्वको क्षण हो । यो पुरस्कारले नेपाल तथा नेपालीको विश्वस्तरमा अझ इज्जत तथा सम्मान बढाएको महशुस गरेको छु’, उनले भनेका छन् ।
अवार्डका लागि एक सय ४५ व्यक्ति तथा संस्थाले मनोनयन दर्ता गराएका थिए । अन्तिम ६ व्यक्ति तथा संस्थाको सूचीमा परेर रुइत छनोट भएका थिए।
बहराइनका राजा सेख हमद विन इसा अल खालिफाले सन् २००९ मा पूर्वराजा सेख इसा बिन सलमान अल खालिफाको नाममा स्थापना गरेको ‘इसा अवार्ड फर सर्भिस टु ह्युमानिटी’ संस्थाले अवार्ड प्रदान गर्दै आएको छ।
डा रुइतले मोतियाबिन्दु उपचार गर्ने सरल विधि विकास गरेका छन्। उनले प्रतिष्ठानमा अन्धोपन हटाउन आँखामा हाल्ने अन्तर्राष्ट्रियस्तरको लेन्स ‘इन्ट्राअकुलर लेन्स’ उत्पादन गर्दै आएका छन्
