पूर्वीचितवनको राप्ती नगरपालिका–९, रसौलीमा रहेको श्री लेकाली आधारभूत विद्यालय, रोहितमा दाताको सहयोगमा कम्प्युटर कक्ष भवन निर्माण गरेको छ ।
सामाजिक कार्यमा सक्रिय चितवनकै पुरानो लायन्स क्लव अफ नारायणगढले सो विद्यालयका लागि कम्प्युटर कक्ष भवन निर्माण गरेको हो । सो भवनलाई औपचारिक रुपमा लायन्सले विद्यालयलाई हस्तान्तरण गरेको छ । एक कार्यक्रमकाबीच लायन्स इन्टरनेशनल डिष्ट्रिक्ट ३२५ आर नेपालका गर्भनर सिद्धार्थलाल चुकेले शिलालेख अनावरण गर्दै भवन हस्तान्तरण गरेका हुन् ।
सो क्रममा बोल्दै चुकेले लायन्सले दिर्घकालिन उपलब्धी हासिल हुनेगरि काम गर्दै आएको भन्दै यस सहयोगले विद्यालयको पठनपाठनमा थप सहयोग मिल्नेमा विश्वास व्यक्त गरे । लायन्स क्लव अफ नारायणगढका अध्यक्ष शान्त कुमार पियाले विद्यालयको आवश्यकतालाई ध्यानमा राखेर भवन निर्माणमा सहयोग गरिएको बताए । उनले आगामि दिनमा यसप्रकारका सहयोगलाई निरन्तरता दिने बताए । ‘जहाँ आवश्यकता रहन्छ, त्यहाँ हामीले सहयोग गर्ने हो, विकट ठाउँमा रहेको यो विद्यालयसम्म पुग्न पाएकोमा हामी खुशी छौं’–अध्यक्ष पियाले भने ।
कार्यक्रममा बोल्दै विद्यालय व्यवस्थापन समितिकी अध्यक्ष गायत्री थापाले विद्यालयमा अझै भौतिक पूर्वाधारको आवश्यकता रहेको बताइन् । उनले लायन्स जस्तो संस्थाबाट विद्यालयलाई सहयोग हुनु गौरवको विषय रहेको भन्दै आगामि दिनमा यस्तै सहयोगको अपेक्षा राखिन् ।
विद्यालयका प्रधानाध्यापक लक्ष्मीकान्त सापकोटाले आफ्नो विद्यालयको भौतिक अवस्था बारे सामान्य जानकारी गराउँदैमा यतिधेरै सहयोग मिलेको खुशी लागेको बताए । उनले सहयोगका लागि लायन्स क्लव अफ नारायणगढलाई धन्यवाद ज्ञापन गरे ।
एक कोठे भवन निर्माणका लागि कुल ३ लाख ७६ हजार २५० रुपैयाँ खर्च भएको भवन निर्माणका संयोजक लायन सनद कुमार पियाले जानकारी दिए । सो भवनमा गर्मीका लागि पंखा समेत जडान गरिएको छ ।
यस विद्यालयका अन्य सबै भवनहरु जीर्ण अवस्थामा छन् । वि.सं.२०४१ सालमा स्थापना भएको यस विद्यालयमा हाल १ देखि कक्षा ८ सम्म अध्ययापन हुँदै आएको छ । हाल १३५ जना विद्यालयहरु यस विद्यालयमा अध्ययरत छन् ।
