Breaking News
उपमेयर बन्न कांग्रेस भरतपुरका सभापति अधिकारीले दिए वडा अध्यक्षबाट राजीनामा
चितवन, वैशाख ९–
नेपाली कांग्रेस भरतपुर महानगर समितिका सभापति चित्रसेन अधिकारीले भरतपुर–२१ को वडा अध्यक्षबाट राजीनामा दिएका छन् । आज (शुक्रबार) वडाध्यक्ष अधिकारीले महानगर उपप्रमुख पार्वती शाह ठकुरीलाई राजीनामा बुझाएका हुन् । उनको राजीनामा उपप्रमुख ठकुरीले स्वीकृत गरेकी छन् ।
आसन्न स्थानीय तहको निर्वाचनमा उपमेयर पदमा उम्मेद्वारी दिन लागेकाले वडा अध्यक्षबाट राजीनामा दिएका अधिकारीले नारायणी अनलाइनलाई बताए । अधिकारी भरतपुर महानगरपालिकाको उपप्रमुख पदका लागि नेपाली कांग्रेसबाट संभावित उम्मेद्वार हुन् । कांग्रेसले उपप्रमुखमा अधिकारीलाई नै टिकट दिने बलियो संभावना छ । उनलाई केहीदिन अघि कांग्रेस सभापति एवं प्रधानमन्त्री शेरबहादुर देउवाले बालुवाटर बोलाएर गठबन्धनलाई बलियो बनाउन निर्देशन दिएका थिए । सोही बेला देउवाले अधिकारीलाई उपप्रमुख बनाउने संकेत दिएका थिए ।
गठबन्धनले भरतपुरको मेयर माओवादी केन्द्र र उपमेयर कांग्रेसलाई दिने सहमति गरेको छ । सोही अनुसार गठबन्धनको तर्फबाट मेयरमा पुनः रेनु दाहाल चुनावी मैदानमा उत्रिदै छिन् । उनले पनि शुक्रबार नै राजीनामा दिइ सकेकी छन् ।