सत्तागठबन्धनमा भरतपुर महानगरपालिकाको मेयर नेकपा (माओवादी केन्द्र)लाई दिने सहमति भएपछि आक्रोशित कांग्रेस नेता तथा कार्यकर्तालाई सम्झाउन प्रधानमन्त्री कार्यालयका राज्यमन्त्री उमेश श्रेष्ठ चितवन आइपुगेका छन् ।
उनी बुधबार दिउँसो बुद्ध एयरमार्फत भरतपुर आइपुगेका हुन् । प्रधानमन्त्री एवं पार्टी सभापति शेरबहादुर देउवाले भरतपुरको अवस्था गम्भिर बन्दै गएपछि स्थिति साम्य बनाउन केन्द्रीय सदस्य एवं मन्त्री श्रेष्ठलाई चितवन पठाएका हुन् ।
भरतपुर विमानस्थलमा संचारकर्मीहरुसंग कुरागर्दै मन्त्री श्रेष्ठले देशको राष्ट्रिय राजनीति सम्हाल्नका लागि गठबन्धन बनेको भन्दै यसलाई सामान्य रुपमा लिन सबैलाई आग्रह गरेका छन् । उनले देशका अन्य तीन महानगरपालिकामा कांग्रेसले नेतृत्व गर्ने भएकाले भरतपुरलाई छाड्न बाध्य भएको बताए । ‘निर्णय पश्चात आवेश, इच्छाआकाङ्क्षा हुनु स्वभाविक हो, दुईचार दिन बसेर साथीहरुलाई सहजीकरण गर्नका लागि चितवन आएको हुँ। सबैलाई मिलाएर लैजान्छौं।’–मन्त्री श्रेष्ठले भने ।
