सत्तागठबन्धन दलहरुले आसन्न स्थानीय तहको निर्वाचनमा तालमेल गरेर अघि बढ्ने निर्णय गरेसंगै नेपाली कांग्रेस चितवनले भरतपुरको मेयर आफूले पाउनु पर्ने अडानलाई केन्द्रसम्म पुर्याएको छ ।
आज जिल्ला नेतृत्वको टोली आज काठमाडौँ पुगेर कांग्रेसका वरिष्ठ नेता एवं सत्तारुढ गठबन्धनले निर्माण गरेको स्थानीय तह चुनाव केन्द्रित तयारी तथा अनुगमन समितिका संयोजक रामचन्द्र पौडेललाई कांग्रेस चितवनले गरेको निर्णय बुझाएको छ । जिल्ला सभापति राजेश्वर खनालले सो निर्णय नेता पौडेललाई बुझाएका छन् ।
जिल्लाको निर्णय बुझाउन कांग्रेस केन्द्रीय सदस्यद्धय टेकप्रसाद गुरुङ, दिनेश कोइराला, कांग्रेस चितवनका निवर्तमान सभापति जितनारायण श्रेष्ठ, पूर्वसांसद जगन्नाथ जगन्नात पौडेललगायतको टोली काठमाडौँ पुगेको हो । निवर्तमान सभापति श्रेष्ठले भरतपुर महानगरपालिकाको मेयर नछाड्ने जिल्लाको निर्णय नेता पौडेललाई बुझाएको जानकारी दिए । ‘हामी काठमाडौँमा उपलब्ध नेताहरु पौडेलसंग भेट गरेर जिल्लाको निर्णय बुझाएका छौं, भरतपुरको मेयर नछाड्ने हाम्रो अडान सुनाएका छौं’–श्रेष्ठले भने ।
उनका अनुसार वरिष्ठ नेता पौडेल चितवनको निर्णय प्रति सकरात्मक देखिएका छन् । चितवनको निर्णयलाई गम्भिरताका साथ लिदै नेता पौडेलले पार्टी सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल ‘प्रचण्ड’संग कुरा राख्ने बचन दिएको श्रेष्ठले बताए । चितवनको आवश्यकता र औचित्यको आधारमा पनि भरतपुरको मेयर कांग्रेसले पाउनुपर्ने माग जोडदारसंग उठाईएकाले जिल्लाको निर्णयप्रति सकरात्मक जवाफ आउनेमा विश्वस्त छ ।
डेलिगेशन टोली आजै कांग्रेसका अन्य पदाधिकारीसंग भेट गर्दैछ भने प्रधानमन्त्री एवं पार्टी सभापति शेरबहादुर देउवासंग पनि भेट गर्ने तयारी गरको छ । कांग्रेस चितवनले केहीदिन अघि भरतपुरको मेयर नछाड्ने गरि गठबन्धन गरेर अघि बढ्ने निर्णय गरेको थियो । साथै भरतपुरको मेयर नपाए गठबन्धन तोडेर एक्लै निर्वाचनमा होमिने समेत निर्णय गरेको छ ।
