माओवादी केन्द्रका अध्यक्ष पुष्पकमल दाहाल ‘प्रचण्ड’ ले पार्टीका नेतारकार्यकर्ताहरूमा विचलन देखिन थालेको बताएका छन् । काठमाडौँमा आयोजित पार्टीको आन्तरिक प्रशिक्षणलाई सम्बोधन गर्दै प्रचण्डले यस्तो बताएका हुन् । ‘युद्धको समयमा शहादत दिनका लागि तँछाडमछाड गर्दै झगडा गर्नेहरू नै आज पदका लागि मरिहत्ते गर्ने अवस्था पुगेको देख्छु,’ प्रचण्डले भनेका छन् ।
पार्टीमो वैचारिक अस्पष्टतासमेत बढ्दो रहेको प्रचण्डको ब्रिफिङ्ग थियो । ‘अराजकता, गुटबन्दी बढ्दो छ । पदलोलुपता बढ्दो छ । यही पार्टी हो जहाँ युद्धको समयमा शहादत दिन जान पाइएन भनेर झगडा गर्नेको जमात हुन्थ्यो । अहिले पद पाइएन भनेर रुने, कराउने र भाग्नेको जमात भयो ।’ नेता कार्यकर्तामा देखिएको अवसरवादी प्रवृत्तिप्रति उनले आक्रोश पोखेका छन् । ‘अनौठो लाग्छ तिनै साथीहरू अहिले पद र पैसा नपाउँदा अर्कै ढङ्गले व्यवहार गर्छन्’, प्रचण्डले भनेका छन् ।
